المجلس الأعلى للإعلام هيحدد مواضيع المسلسلات

المجلس الأعلى للإعلام، عمل لجنة مخصوصة لمناقشة الأعمال التلفزيونية، اسمها "لجنة الدراما". اللجنة اجتمعت الأربع اللي فات مع رئيس غرفة صناعة السينما، الاجتماع طلع منه قرارات مهمة كتير هتأثر على صناعة الدراما في مصر. اللجنة اتفقت بالإجماع إن الدراما المصرية هتفضل ليها الريادة وإنها بتشكل الوجدان المصري والعربي كله، علشان كده أعضاء اللجنة شافوا ضرورة عمل دليل، فيه المواضيع الأولى مناقشتها في الدراما.

اللجنة شايفة إن الدراما لازم تناقش الموضوعات اللي بتفيد المجتمع وتظهر إيجابياته. اللجنة برضه شافت ضرورة وضع ضوابط للعملية الإنتاجية ومحاربة الأجور المبالغ فيها للفنانين والفنيين. أعضاء اللجنة اتفقوا إن كل التوصيات اللي هتخرج منها هيتعمل على أساسها قوانين هتكون ملزمة لصناع الدراما.