عرض اول مسرحية بيمثل فيها رجالة وستات فى تاريخ السعودية

لأول مرة في تاريخ المملكة السعودية، هتتعرض مسرحية فيها اختلاط بين الجنسين. مسرحية "حياة الإمبراطور"، هتتعرض بكره الجمعة على مسرح جامعة دار العلوم الخاصة في الرياض، وهتشارك فيها الممثلة "نجاة" قدام ممثلين رجال. الاختلاط مش بس هيكون على خشبة المسرح لكن بين الجماهير كمان، المسرح هيسمح إن الرجالة والستات يقعدوا على كراسي جنب بعض، ودي برضه سابقة تاريخية.

المسرحية هتتعرض برعاية هيئة الترفيه الحكومية، اللى واقفت على المسرحية بعد ما اتأكدت إنها بتراعي المعايير الدينية والأخلاقية للمملكة. فرقة "الستائر الحمراء" اللي بتقدم العرض، بتجهز لمسرحية مختلطة جديدة اسمها "علاء الدين".