المنظمة اللي بتقدم المساعدات للفلسطينيين هتقفل بسبب نقص التبرعات

الأمم المتحدة أعلنت إنها محتاجة أكثر من 200 مليون دولار عشان تقدر تكمل تقديم خدماتها للاجئين الفلسطينيين من خلال وكالة الأونوروا UNRWA، المعنية بإغاثة وتشغيل اللاجئين الفلسطينيين، وحذر "ميروسلاف لايتشاك" رئيس الجمعية العامة للأمم المتحدة، إنه لو ماتمش تأمين المبالغ المالية المطلوبة، الأمم المتحدة هتضطر تقفل جزء من المدارس اللي بتديرها الوكالة مع بداية السنة الدراسية الجديدة في أغسطس القادم، وإن الوكالة مش هتقدر تستكمل تقديم الخدمات والأنشطة الإنسانية في الضفة الغربية وقطاع غزة، بسبب استمرار الأزمة المالية الكبيرة اللي بتمر بيها، بعد خفض أمريكا لموازنة تبرعات المنظمة بحوالي 250 مليون دولار. 

جدير بالذكر إن "أحمد أبو الغيط" الأمين العام لجامعة الدول العربية، دعا الدول العربية للتبرع للوكالة كمحاولة لسد الفجوة المالية الخطيرة اللي بتواجهها المنظمة، وكمحاولة لاستمرار تقديم الخدمات التعليمية اللي بتقدمها الوكالة لحوالي نص مليون طفل فلسطيني في المخيمات، وكمان استمرار الخدمات الصحية اللي بيحصل عليها حوالي 3.5 مليون طفل فلسطيني.