إغلاق شاطئ النخيل في الإسكندرية بسبب حوادث الغرق واللي عاوز ينزل هيمضي على إقرار

أصدر الدكتور محمد سلطان محافظ الإسكندرية، قرار بإغلاق شاطئ النخيل بحي العجمي عشان خطورته على المواطنين.

وقال المحافظ إنه تم التنسيق مع وزارة الري لإرسال لجنة عاجلة من الهيئة العامة لحماية الشواطئ عشان يعاينوا الشاطئ ويبنوا الحواجز الخرسانية ويتخذوا الإجراءات اللازمة لحماية المواطنين، ومنع السياحة فيه بشكل نهائي لمنع تكرار حالات الغرق.

من ناحيته قال اللواء أحمد حجازي، رئيس الإدارة المركزية للسياحة والمصايف بالإسكندرية، إن قرار الإغلاق الصادر عن المحافظة مش منطقي ومش هنقدر ننفذه والشاطئ ده عبارة عن 1800 متر مفتوحين، وأضاف في تصريحات لموقع "مصراوي":"قرار الإغلاق ليس منطقيًا أو عمليًا.. الشاطئ مش باب هنقفله دا 1800 متر مفتوحة.. والمواطن محدش يقدر عليه ولديه تصميم على نزول البحر".

في الوقت الحالي، ورغم قرار الإغلاق، فاللي عاوز ينزل الشاطئ بيمضي على إقرار، عشان في حالة حدوث أي حوادث أو غرق، يكون قرار الإغلاق والإقرار اللي المواطن مضى عليهم، بمثابة إعفاء أي جهة من المسؤولية، ويكون المواطن هو المسؤول الوحيد عن نفسه.