أول مطعم للكورن فليكس ف مصر في المعادي

بتحب الكورن فليكس؟ طب بتحب الكورن فليكس لدرجة إنك تدخل تاكل في مطعم مش بيقدم أي حاجة غير الكورن فليكس؟ لو بتحبه للدرجة دي، في 3 شباب في المعادي عملوا مطعم مخصوص للكورن فليكس. سي إن إن عربي قابلوا أحمد سلامة، وعلي كامل، ومصطفى هاني، اللي عملوا "Cereal & Flakes"، المتخصص في تقديم أنواع مختلفة من الكورن فليكس.

الشباب قالوا إن الفكرة جاتلهم لما كانوا بيسافروا بره ويلاقوا مطعم متخصصة في الكورن فليكس بس، فقرروا يعملوا المشروع ده ودروسوا كل حاجة علشان يقدروا يختاروا مكان المطعم والجمهور المستهدف، وكمان يأمنوا مصدر يجيبوا منه الكورن فليكس على طول لأنه مستورد مش من مصر. المطعم حاليًا بيقدم أكتر من 25 نوع كورن فليكس.

من ضمن الأطباق المميزة، إنك ممكن مثلا تاكل كورن فليكس وتضيف عليه أيس كريم أو فاكهة أو شيكولاتة أو عسل، ينفع تضيف بوظة أو أوريو  وقرفة وجوز هند. التلاتة قالوا إن الابتكارات دي كلها من اختراعهم، وحاولوا إنهم يبتكروا ومايقلدوش حد.