دكتور في الأزهر بيطالب بفرض ضريبة على تربية الكلاب

طالب الدكتور غانم السعيد، أستاذ الأدب والنقد في جامعة الأزهر، إن في ضريبة تتفرض على كل شخص يربي كلاب في بيته، وبيقول إن الدول الأوروبية فيها ضريبة تربية للكلاب، وكل كلب بيتاخد عليه 120 يورو سنويًا، علشان كدة لازم يتاخد على كل كلب ضريبة ويتسجل ويتعرف صاحبه.

وقال في مكالمه تليفونية مع قناة DMC إن أي شخص عنده كلب في بيته من فصيلة متميزة، وسعره غالي، فالإنسان ده "عايز الرفاهية لنفسه، وبيرفه نفسه، ومن حق الدولة تاخد مقابل على الرفاهية دي، وبيقول أنا مش بتكلم عن كلاب الشوارع، لإن إكرامها والعطف عليها بيتساوى فيها الغني مع الفقير

وقال كمان إن سعر الكلب الواحد أوقات بيعدي 40 ألف جنيه، فلازم يتدفع عليه ضريبة، لإن كمان الكلب ده بياكل وجبتين في اليوم تكلفة كل وجبة منهم 50 جنيه، وقال "الكلب مصروفه في اليوم 100 جنيه، وكمان سعره وسعر أكله ارتفع بعد تحرير سعر الصرف"

صورة الموضوع للمصور مصطفى عبد العاطي