الحمير هتنقرض عشان بيتعمل من جلودها مقوي جنسي

اتسبب ارتفاع الطلب على جلود الحمير في الصين في أزمة حقيقية بتهدد وجودهم في أفريقيا، اللي بقت أهم مورد للصين، اللي طول الوقت بتدور على مادة جيلاتينية اسمها "إيجياو" بحسب "نيويورك تايمز" الأمريكية. الصين نفسها قل عدد الحمير فيها من 11 مليون ل 6 مليون بس، مع توقعات إنها تقل كمان ل 3 مليون، وده اللي خلى الشركات الصينية تستورد كميات ضخمة من جلود الحمير من الخارج.

مادة ال "إيجياو" هي مادة جيلاتينية كانت مخصصة كدواء للأسرة الملكية في الصين في العصور القديمة، وبتستخلص المادة دي من جلود الحمير، وساد اعتقاد قديم إنها محفز جنسي وبتعالج الأرق، وبتمنع ظهور أعراض الشيخوخة، ده السبب اللي خلى المسالخ الصينية تنتشر في أفريقيا، وبيتم دبح آلاف الحمير يوميًا.

في الوقت اللي تمن الكيلو جرام الواحد من ال "إيجياو"، وصل ل 375 دولار، حذر باحثين صينيين في جامعة بكين، إن طلب الصين المرتفع على ال "إيجياو" ممكن يتسبب في انقراض الحمير، بحسب "سكاي نيوز"، وباحثين في مجلة الخيول البيطرية قالوا إن الصين استوردوا الحمير من كل أنحاء العالم بتكلفة عالية، وده بيشكل خطر كبير على الثروة الحيوانية من الحمير في العالم. خلال سنة 2016 النيجر باعت للصين 80 ألف حمار مقارنة ب 27 ألف النسة اللي فاتت، بوركينا فاسو وردت 18 ألف حمار في أول 3 شهور بس من 2017، مقارنة بألف حمار في نفس الوقت السنة اللي قبلها