نقابة المهن الموسيقية: "مشروع ليلى" مش هيغنوا في مصر تاني

من كام يوم، باند "مشروع ليلى" عملوا حفلة في التجمع الخامس، وحصل في الحفلة لغط كتير، بسبب ناس من الجمهور رفعوا علم المثلية الجنسية. ردود الأفعال ماوقفتش عند الشتيمة على السوشيال ميديا أو الشد والجذب بين المؤيد والمعارض، لكن كمان نقابة المهن الموسيقية قررت توقف حفلات مشروع ليلى في مصر، يعني اللي حضروا حفلة التجمع نحب نقولهم كانت آخر مرة.

رضا رجب، وكيل نقابة المهن الموسيقية، قال إن النقابة قررت وقف حفلات مشروع ليلى في مصر، وأكد إن النقابة مش جهة قمع، لكن النوع ده من الحفلات مش هتتعمل في مصر تاني. أضاف كمان إن النقابة ضد أي فن "شاذ" حسب كلامه. رجب صرح بالكلام ده في برنامج "الشارع المصري" على قناة العاصمة. مشروع ليلى سبق واتمنعوا من الغنا في الأردن، وشكلهم هيتمنعوا في مصر كمان.