وزير التعليم: امتحانات الثانوية العامة هتكون "أوبن بوك"

وزير التربية والتعليم طارق شوقي، عمل مؤتمر امبارح عشان يعلن فيه تفاصيل النظام الجديد للثانوية العامة، الوزير قال إنه بيحاول يتخلص من "بعبع" الامتحانات والخوف منها، وإنه حساب الدرجات هيكون تراكمي على مدار 3 سنين ثانوي، وهيبقى امتحانات ربع سنوية بتحصل في المدارس مختلفة عن بعضها ومافيش امتحان هيضم كل حاجة ولا هيتم تلقينه في الدروس الخصوصية. 

الامتحانات هتتجاوب على التابلت، ولو التابلت مش شغال هيتم الامتحان عن طريق أجهزة كمبيوتر، ولو مناطق نائية وفقيرة هيتم الامتحان على ورق لكنه آخر خيار، وكل الامتحانات هتكون بنظام الكتاب المفتوح وهيقدر أي طالب يجيب معاه كتاب، وفي البداية الإجابة هتكون في اللجان عن طريق التابلت والإيميل، لكن نظريًا الطالب يقدر يجاوب من أي مكان، بس في البداية هتكون الإجابة في اللجنة. 

النظام الجديد ده هيبدأ تطبيقه على طلبة أولى ثانوي اللي هيكون معاهم تابلت والمدرس والطلبة هيتواصلوا إلكترونيًا.