"جمعية الزمالك" عاملة حملة للاعتراض علي إزعاج مدارس الحكومة

 جمعية الزمالك عاملة حملة ضد الإزعاج اللي بتسسبه مدارس الحكومة كل يوم الصبح. في أكتر من ٣٠ مدرسة حكومية في الزمالك، وصوت الميكرفونات الصبح بيزعج الناس اللي عايشين هناك، ده حسب كلامهم يعني!

الدوشة اللي بيشتكوا منها، بتبدى من الساعة 7:24 وبتستمر لحد 8:15 وأحيانًا اليوم كله لحد ٢ بعد الضهر. واحدة من سكان الزمالك اسمها تامارا سيف النصر قالت “بيقولوا النشيد الوطني وهتافات الله أكبر وموسيقى وماحدش مهتم بقد إيه ده بيبقى مزعج لينا”

شكاوي أعضاء الجمعية ماجابتش نتيجة، ولما راحوا للمدير رجعوا إيد ورا و إيد قدام فابتدوا يرموا حفاضات وبيض علي المدارس.

الأهالي بيقولوا إنهم مابيعرفوش يناموا الصبح وده مأثر عليهم وبيخليهم يناموا في مواعيد مش مناسبة ومش عارفين يبقوا منتجين في شغلهم. جمعية الزمالك اجتمعت أول مرة السبت اللي فات عشان يناقشوا المشكلة دي، غير إنهم بعتوا جوابات للمديرين بتوع المدارس ووزارة التربية والتعليم. أعضاء الجمعية ناويين يعملوا حملة بفيديوهات علي التلفزيون والسوشيال ميديا عشان يزودوا الوعي بخصوص المشكلة دي. وده كله خطوة أولى وبعدها ممكن ياخدوا إجراء قانوني بس سايبينه حل أخير.

الأكتر من كده كمان إنهم رافضين فكرة العنف اللفظي ضد الاطفال في الميكرفون، زي أنتي يا حيوانة وغيرها، عشان دا بيأثر سلبي على الأطفال.