"منفذ بيع الشاورما" مطعم على شكل مصلحة حكومية

إيه رأيك في مجمع التحرير؟ أو مكتب شركة الكهربا؟ أو مكتب مصلحة الضرايب؟ وحشين صح؟ الأسطورة بتقول إن مافيش مصلحة حكومية حلوة. لو حد قرر يعمل مطعم على شكل مصلحة حكومية، هتطيق تاكل فيه؟ ده حصل فعلًا. "منفذ بيع الشاورما" ده مطعم في مصر الجديدة هيخليك تحس إنك بتاكل جوه مصلحة حكومية. 

المنيو والفاتورة هتلاقيهم على شكل أوراق رسمية، وعلشان تاكل هتقف طابور وتاخد استمارة تطلع بيها على الشباك اللي هيسلمك الأكل. موقع "الوطن" اتكلموا مع أحمد السيد صاحب المطعم، اللي قال إن الطابور عندهم بيتحرك بسرعة مش زي المصالح الحكومية والأكل بيجهز في ثواني. المطعم معلق على الحيط ورق بتعليمات زي اللي بتشوفها في المصالح الحكومية.