تشغيل أتوبيسات بدورين في القاهرة يناير الجاي

هيئة النقل العام هتستقبل ٤٠ أتوبيس بدورين في بداية ٢٠١٨، هيشتغلوا من يناير الجاي وهيتعمل احتفالية كبيرة للافتتاح. الكلام ده أكده اللواء رزق علي، رئيس هيئة النقل العام بالقاهرة. قال كمان إن الشغل هيبتدي ب١٢ أتوبيس كمرحلة أولى، بعدها هيتبدي العمل ب٢٨ أتوبيس على مراحل متتالية.

الأتوبيس مكون من دورين مكيفين وطوله ١٢ متر ويشيل ٧٠ راكب للدورين وفيهم إزاز فاميه عشان الركاب يعرفوا يشوفوا الشارع، بس ماحدش يقدر يشوفهم، ومتغطي كله حتى الدور اللي فوق. الأتوبيس الجديد هيكون كمان مزود بخاصية التتبع، عشان يخضع لرقابة الهيئة. حسب الهيئة، السواقين هيتم اختيارهم بعناية والخبرة العالية شرط مهم.

سعر التذكرة هيكون 5 جنيه لأي دور من الدورين، والأتوبيسات هتكون بتشتغل على المناطق اللي فيه كثافات مرورية عالية، فتساعد في تقليل الزحمة. تكلفة الدفعة الأولى حسب رئيس الهيئة، هتبقى 40 مليون جنيه من ميزانية الدولة وهيتوفرله قطع غيار ب120 مليون جنيه.