"العمل": إلزم المؤسسات بتوفير حضانات لأبناء العاملات حتى 4 سنوات

القرار بيُلزم أي صاحب عمل أو شركة فيها 100 عاملة أو أكتر إنها توفّر حضانة، سواء بإنشائها أو التعاقد مع حضانة قريبة، للأطفال لحد سن 4 سنين، وكمان لازم تكون مجهزة لاستقبال الأطفال من ذوي الإعاقة.

أما الشركات اللي فيها أقل من 100 عاملة، فممكن تشترك مع شركات قريبة منها في نفس المنطقة (في نطاق 500 متر) عشان يبنوا حضانة مشتركة، أو يتعاقدوا مع حضانة مرخصة.

كمان القرار حدد شروط مهمة للحضانات، زي إنها تكون قريبة من مكان الشغل، مخصصة لرعاية الأطفال وذوي الإعاقة، وبعيدة عن التلوث والضوضاء اللي بتحصل بسبب الأنشطة الصناعية، ولازم تاخد ترخيص من وزارة التضامن قبل التشغيل بيشهد التزامها بالمواصفات العامة من الموقع والمبنى والتجهيزات والاشتراطات الصحية، وتكون خاضعة للرقابة زي أي حضانة تانية.

أما بالنسبة لتكلفة الاشتراك في الحضانة، فالعامل أو العاملة اللي هيستفاد من الخدمة هيدفع اشتراك شهري بنسبة 4% من الأجر عن الطفل الأول، و3% للطفل الثاني، و2% للطفل الثالث، ولو في أطفال أكتر من كده بيتحمل العامل التكلفة كاملة.

وفي حالة إن الشركة أو صاحب العمل ماقدرش يوفّر حضانة، يبقى عليه يتحمل تكلفة رعاية أطفال العاملات في حضانة مرخصة.