جون سينا هيشارك في فيلم مصري

المصارع المحترف جون سينا تعاقد مع المنتج حسين القلا على المشاركة في بطولة فيلم "التجربة المكسيكية"، من تأليف محمود حمدان ومحمد محرز وإخراج حسين السيد.

"سينا" هيوصل للقاهرة بعد أسبوعين تقريبًا عشان يبدأ تصوير المشاهد الأولى من أحداث الفيلم وهيستمر وجوده في القاهرة لمدة 11 يوم، حيث إن معظم الفيلم هيتم تصويره في المكسيك، وهيكمل "سينا" تصويره هناك بعد ما ينتهي من تصوير مشاهده في القاهرة.

محمود حمدان، مؤلف الفيلم بيقول إن الفيلم تم تحضيره من 3 سنين، ووقف بسبب المشاكل الاقتصادية، ورجع تاني لما تم الاتفاق مع "سينا" في دبي وطلب تعديل بسيط في السيناريو بسبب عدم رغبته في ظهوره بشخصية شريرة أو دموية، وإنه هيظهر بشخصيته الحقيقية كمصارع مش كممثل. 

"حمدان" قال كمان إن هيتم تصوير 60% من أحداث الفيلم في المكسيك، مع الاستعانة بمصمم معارك ومدير تصوير عالميين. صناع الفيلم المصرى رشحوا نجوم عالميين زي فان ديزل وتايسون وبروس ويلز، لانضمام واحد منهم لفريق عمل الفيلم بجانب جون سينا، ومن المقرر الاستقرار على واحد منهم خلال الأيام الجاية للتعاقد معاه قبل دخول مواقع التصوير.