اليونان منحت الجنسية لمصريين انقذوا مواطنين يونانيين من حرائق الغابات

منحت اليونان جنسيتها لـ 3 صيادين مهاجرين، 2 مصريين وألباني، أنقذوا مواطنين يونانيين من حرائق الغابات اللي انتشرت يوليو اللي فات.

الرئيس اليوناني بروكوبيس بافلوبولوس شكر الصيادين التلاتة لإنسانيتهم وتضامنهم في إنقاذ عشرات الأشخاص في احتفال منح الجنسية، وبحسب موقع بي بي سي بالعربية، نقلت وكالة الأنباء اليونانية عن الرئيس إشارته لتجنيس الصيادين أنهم كمواطنين يونايين بقوا مواطنين أوروبيين برضه. 

والمهاجرين التلاتة اللي تم منحهم الجنسية اليونانية هم: جاك جاني من ألبانيا وإبراهيم محمود موسى وعماد الهيمي من مصر. ولحد دلوقتي مش معروف بالظبط عدد الأشخاص اللي تم إنقاذهم من النيران، بس وزير الداخلية ألكسيس تشاريتسيس قال إن التلاتة مع زملائهم اليونانيين أنقذوا "عشرات من أبناء بلدنا".

حوالي 90 شخص على الأقل قتلوا في حرائق الغابات اللي شهدتها اليونان بعد انتشار النيران في أجزاء من شبه جزيرة أتيكا بسبب الرياح القوية، وكانت بلدة ماتي، اللي بتعد منتجع سياحي، من أكتر المناطق اللي تضررت بالنيران.