بنك ناصر هيقدم عربيات بالتقسيط للي عايز يشتغل في شركة SWVL

شركة "سويفل" لطلب سيارات النقل الجماعي عبر المحمول وبنك ناصر، اتفقوا على توقيع بروتوكول، عن طريقه يوفر بنك ناصر التمويل لشراء عربيات نقل ركاب بالتقسيط للسائقين غير القادرين ماليا، اللي عايزين ينضموا لـ "سويفل" مقابل فائدة ميسرة.

وقال مصطفى قنديل، الشريك المؤسس فى "سويفل"، إن المفاوضات بين الشركة والبنك بدأت من فترة وبقى في اتفاق شبه نهائي على كل البنود، بحيث إن "سويفل"هتكون حلقة الوصل بين السائق والبنك.

وأضاف إن الشركة بتستهدف تمويل شراء 500 عربية نقل جماعي خلال 3 شهور، من خلال طرق تمويلية متنوعة، زي التقسيط من بنك ناصر أو شركة فاليو، وإن الشركة ساعدت في تمويل شراء 200 عربية خلال الفترة اللي فاتت.

بكده دي بتكون تاني اتفاقية لـ "سويفل" فى تمويل شراء سيارات النقل الجماعي، بعد اتفاقيتها مع شركة "فاليو" التابعة للمجموعة المالية «هيرميس» القابضة للاستثمارات المالية تحت رعاية سحر نصر وزيرة الاستثمار والتعاون الدولي.