عرض فيلم هيبتا 2 على منصة STARZPLAY يوم 8 ديسمبر

منصة starzplay هتعرض فيلم هيبتا 2 “المناظرة الأخيرة” يوم 8 ديسمبر، وده بعد شهرين فقط من عرضه في السينمات. 

فيلم هيبتا 2 بطولة منة شلبي، ومحمد ممدوح، وكريم قاسم، وجيهان الشماشرجي، ومايان السيد، وحسن مالك، وكريم فهمي، وسلمى أبو ضيف، وهشام ماجد، وأشرف عبد الباقي، والفيلم من تأليف محمد صادق، وسيناريو وحوار محمد جلال ونورهان صادق، وإخراج هادي الباجوري. 

وأحداث فيلم هيبتا 2 بتدور في إطار رومانسي، في رحلة داخل عالم العلاقات العاطفية، وبيستعرض الفيلم 4 قصص حب مختلفة في إطار مناظرة بين شخصين بآراء مختلفة، وبتطرح سارة -منة شلبي- أبلكيشن للتعارف، واللي بيقدم تساؤلات عن معنى الحب في عصر الذكاء الاصطناعي. 

وفي تصريحات سابقة للمخرج هادي الباجوري، أكد إن الجزء التاني من فيلم هيبتا مختلف تماما عن الجزء الأول، وأكد إنه أخد وقت طويل عشان يقدم جزء تاني بعد النجاح الكبير لجزئه الأول في 2016.