فتح باب التقديم في الدورة السادسة من جائزة المبدع الصغير

الأدب: وتشمل القصة القصيرة، والشعر، والتأليف المسرحي.
الفنون: وتشمل الرسم، والعزف على الآلات الموسيقية زي الكمان والبيانو، والغناء.
الابتكار والإبداع: وتشمل التطبيقات والمواقع الإلكترونية، والابتكارات العلمية.

لو حابب تقدم في المسابقة  في أي مجال من المجالات دي، فدي شروط المشاركة:

- لازم المتقدّم يكون مصري الجنسية، وعمره مايزيدش عن 18 سنة في أول يوم لفتح باب التقديم.
- الأعمال المشاركة تكون مكتوبة باللغة العربية.

- ماينفعش المتقدّم يكون فاز قبل كده بالجائزة في نفس الفئة العمرية، وكمان مايكونش قدم نفس العمل في مسابقة أو جائزة تانية قبل إعلان النتيجة.

 في حالة العمل الجماعي (لفرعي التطبيقات والمواقع الإلكترونية – الابتكارات العلمية):

-لازم كل المشاركين يوافقوا على التقديم.

-الحد الأقصى 3 مشاركين في العمل الواحد.

-باقي الفروع مسموح فيها التقديم الفردي فقط.

لو اتضح إن العمل مسروق أو منتحَل أثناء التحكيم أو بعد الفوز، المتقدّم بيتشال من المسابقة وبيتمنع من التقديم تاني، ولو كان كسب الجايزة بيتم سحبها.

 التحكيم بيتم على مرحلتين:
فرز الأعمال المقدّمة، ومقابلة شخصية مع المتقدّم علشان مناقشة العمل (وبيكون أونلاين لو المتقدّم مقيم بره مصر).

 الجايزة ليها فئتين عمريتين:

من 5 لـ12 سنة (المستوى الأول).

من فوق 12 لـ18 سنة (المستوى التاني).

 ومينفعش التقديم في أكتر من فرع واحد.

جائزة الدولة للمبدع الصغير بتدعم الأطفال الموهوبين، وهدفها الأساسي هو اكتشاف المواهب المبكرة وتحفيز الإبداع والابتكار في مجالات الثقافة، والآداب، والفنون، وكل أشكال الإبداع المختلفة.

الفكرة مش بس في الجائزة نفسها، لكن كمان في رعاية الدولة للفائزين وتنمية مواهبهم من خلال المجلس الأعلى للثقافة علشان يقدروا يكمّلوا طريقهم في الإبداع.

لمعرفة تفاصيل وشروط الجائزة والتقديم، تقدروا تضغطوا على اللينك ده:  رابط التفاصيل

 الصورة لأحد الفائزين بجوائز الدولة للمبدع الصغير في الدورة الخامسة.