فتح حسابات وتقديم خدمات مجانية بالبنوك حتى ٣١ أكتوبر

البنوك المصرية هتقدم مجموعة من الخدمات المصرفية المجانية للعملاء حتى 31 أكتوبر 2026، وده بمناسبة اليوم العالمي للإدخار.

الخدمات المجانية اللي هتقدمها البنوك هتكون:

فتح حسابات من غير رسوم ومن غير حد أدنى، وإصدار بطاقات خصم مباشر ومدفوعة مقدماً ومحافظ إلكترونية، والاشتراك في خدمات الإنترنت والموبايل البنكي مجانًا، وتقديم ورعاية أنشطة التثقيف المالي لكل الفئات.

الخدمات المجانية دي وغيرها، بتيجي ضمن فعاليات الشمول المالي اللي بيرعاها البنك المركزي المصري، واللي هدفها تمكن كل شرائح المجتمع من إنهم يوصلوا للمنتجات والخدمات المالية البنكية اللي بتناسب احتياجاتهم المختلفة.

وعدد فعاليات الشمول المالي اللي بتشارك فيها البنوك كل سنة، هما 6 فعاليات، بتبدأ باحتفالية المرأة من 8 لـ 31 مارس، واليوم العربي للشمول المالي من يوم 1 لـ 30 أبريل، واليوم العالمي للشباب من 1 لـ 15 أغسطس، واحتفالية الفلاح من يوم 1 لـ 15 سبتمبر، واحتفالية الإدخار من 15 لـ 31 أكتوبر، واحتفالية ذوي الهمم من 1 لـ 15 ديسمبر.