محمد صلاح يفوز بجائزة الأفضل في الدوري الإنجليزي 2025

محمد صلاح فاز بجايزة أفضل لاعب في إنجلترا لسنة 2025، المقدمة من رابطة لاعبي كرة القدم المحترفين، للمرة التالته في مسيرته.

وبكده محمد صلاح بقى أول لاعب في تاريخ الدوري الإنجليزي كله، يفوز بالجايزة دي 3 مرات في مسيرته، بعد ما كسبها قبل كده سنة 2018 و2022.

وده بعد تفوقه على منافسيه في جايزة أفضل لاعب في إنجلترا 2025، وهما الأرجنتيني أليكسيس ماك أليستر لاعب ليفربول، وديكلان رايس لاعب أرسنال، وكول بالمر لاعب تشيلسي، وألكسندر إيزاك لاعب نيوكاسل، وبرونو فرنانديز لاعب مانشستر يونايتد.

محمد صلاح قدم في ٢٠٢٤ - ٢٠٢٥ موسم استثنائي بمساهمته في تحقيق لقب الدوري الإنجليزى الممتاز "البريميرليج" للمرة العشرين فى تاريخ ليفربول، بالإضافة لفوزه بجائزة الحذاء الذهبي كأفضل هداف في الدوري الإنجليزي الممتاز برصيد 29 هدف، للمرة الرابعة في مسيرته.

وكمان فاز بجايزة أفضل لاعب في الدوري الإنجليزي من رابطة الكتاب الإنجليز، وجايزة أفضل صانع أهداف في نفس المسابقة، بصناعة 18 هدف.

جدير بالذكر صلاح موجود ضمن قايمة الـ 30 مرشح للفوز بجايزة الكرة الذهبية لأحسن لاعب في العالم لسنة 2025.