ساعة في الضلمة.. تجربة جديدة هتعيشها في مصر

لما قالولنا هتقعدوا ساعة في الضلمة، فضلنا نقول يعني إيه وإزاي؟ وهنزهق ومش هنستحمل وإيه اصلًا ممكن نعمله في ساعة في الضلمة، بس لما دخلنا فكرتنا اتغيرت وقعدنا أكتر من ساعة. 

Dialogue in the dark مشروع موجود في 39 دولة حول العالم، ومصر أول دولة في أفريقيا والوطن العربي تستضيفه، الساعة اللي هتعيشها في الضلمة دي هتعلمك وهتفاجئك وهتخضك، هتكتشف إنك تقدر تعيش حياتك كلها وانت مش شايف من غير عوائق وهتعرف إزاي تتعامل مع شخص كفيف وإزاي لو هو مش شايف بيعرف يتعامل في الدنيا، هما مش أقل منك، ولا محتاجين مساعدتك، هما بشر والضلمة بقت حياتهم بس مش بتخوفهم. 

المشروع فيه 4 مراحل فيها حاجات مختلفة هتحس بتغيير الأرضيات وبملمس اللي حواليك وبروايح هتشمها، وأصوات هتسمعها، وفي الاخر هتخرج احساسك مختلف تمامًا عن لحظة دخولك. 

المكان موجود قدام المنطقة الصناعية في مدينة نصر وممكن تتصل تحجز من صفحتهم على فيسبوك أو من الرقم ده 01062695649