عندك فكرة إن "بنات وسط البلد" كان سبب الصلح بين منة شلبي وهند صبري؟

من كام يوم كنا بنحتفل بـ اليوم العالمي للصداقة ولو بصينا على السينما المصرية مش هنلاقي علاقة صداقة أقوى ولا أشهر من صداقة "ياسمين" و"جُمانة" في فيلم "بنات وسط البلد" اللي اتعرض سنة 2005 ومن ساعتها والعلاقة ده أيقونة للصداقة في الأفلام المصرية

بس هل كنت تعرف إن الفيلم ده كان سبب في الصلح بين منة شلبي وهند صبري؟

منة شلبي حكت قبل كدة في لقاء سابق إنها مكانتش على وفاق مع هند صبري زمان، وإن في ناس كانت بتوقع ما بينهم وبرغم إن مكانش في بينهم خناق بس برضه مكانش مفيش حُب، وكل حاجة اتغيرت لما المخرج محمد خان عرض عليهم فيلم "بنات وسط البلد" وحسّ إن مفيش وفاق بينهم وده مش هينفع لأن الفيلم قصته بتدور حوالين اتنين صحاب جدًا.

فـ محمد خان قرر يعزمهم عنده في البيت قبل تصوير الفيلم، ووهما بيعملوا بروفة للفيلم ولسة هيقرأوا السيناريو، منة شلبي قالت لـ هند صبري إنها عندها كلام محتاجة تقوله وصفّوا كل حاجة بينهم واكشتفوا إن كان في ناس بتوقع بينهم لكن فعليًا مفيش مشاكل بينهم.

وقالت منة شلبي إن علاقتها بـ هند صبري قبل القعدة في بيت محمد خان كانت حاجة، وبعدها حاجة تانية خالص، وبقوا أقرب صحاب في الوسط الفني من وقتها وعلاقة "ياسمين" و"جُمانة" اتحولت من فيلم "بنات وسط البلد" على الشاشة، لعلاقة صداقة حقيقية بينهم في الواقع كمان.