عندك فكرة إن في أعمال فنية كتير الرقابة غيّرت اسماءها؟

مش كل الأعمال السينمائية والدرامية اللي بنشوفها بتكون طلعت باسمها اللي اتحدد من البداية، الأسماء تحديدًا بتعدي بمراحل كتير ودايمًا بيكون في أسماء أولية لكن مع مرور مراحل التصوير والتنفيذ، الاسم ممكن جدًا يتغير قبل ما يخرج للجمهور وده بيحصل لأسباب كتير، لكن السبب الأشهر لـ ده هو الرقابة اللي أحيانًا بيكون عندها تحفظات على بعض الأسماء.

الرقابة أحيانًا بتطلب تغيير الاسم بشكل كامل، زي اللي حصل في فيلم "رحلة 404" بطولة منى زكي وإخراج هاني خليفة، واللي اتعرض سنة 2024.

الفيلم في البداية كان اسمه "القاهرة-مكة" وده لأن شخصية العمل الرئيسية طول الفيلم بتحاول ترتب رحلة حج عشان تتطهر من ذنوبها، لكن الرقابة اعترضت على الاسم وصنّاع غيروه من "القاهرة-مكة" لـ "رحلة 404".

وساعات برضه الرقابة مش بتطلب إعادة تشكيل الاسم من أول وجديد، لكن بتطلب إن يحصل تعديلات بسيطة، زي ما حصل في فيلم "الحياة منتهى اللذة" اللي اتعرض سنة 2005، لما كان اسمه في البداية "منتهى اللذة".

لكن الرقابة اعترضت وقالت إن الاسم فيه بعض الإيحاءات، فـ صناع الفيلم بقيادة المخرجة منال الصيفي غيّروا اسمه من "منتهى اللذة" لـ "الحياة منتهى اللذة".

كمان ده اللي حصل في فيلم "خيانة مشروعة" بطولة هاني سلامة واللي اتعرض سنة 2006، الفيلم في البداية كان اسمه "خيانة شرعية" لكن الرقابة اعترضت وقالت إن ماينفعش نضيف صبغة دينية لـ لفظ "الخيانة" فا صناع الفيلم غيّروه من "خيانة شرعية" لـ "خيانة مشروعة".