عندك فكرة إن "ورقة شفرة" اترفض ومكانش هيتعرض في السينما؟

فيلم "ورقة شفرة" اللي اتعرض سنة 2008 كان طفرة في نوعية الإفيهات ونوع الهزار اللي الثلاثي أحمد فهمي وهشام ماجد وشيكو كانوا بيعملوه ونجح نجاح مش عادي وكان الانطلاقة الأولى ليهم.

بس اللي مش كل الناس تعرفه إن الفيلم ده برغم نجاحه الكبير إلا إنه كان شبه متراهن على عدم نجاحه، وكمان الموزعين السينمائيين رفضوه علشان شافوا إنه مش شبه الحاجات اللي الجمهور بيحبها الفترة دي.

وحكالنا ده المنتج والمؤلف محمد حفظي، منتج "ورقة شفرة"، وقال في حواره مع "الفصلة": "شركة فيلم كلينيك هي اللي قدمت شيكو وفهمي وهشام في البداية، كنت واثق إنهم هيكملوا، لكن لحد ما الفيلم نزل أنا ماكنتش متأكد إنه هينجح.

وكمان الفيلم اترفض من موزعين كتير كانوا حاسين إنه مش هينجح في دور العرض لكن أنا أخدت الموضوع تحدي والفيلم فعلًا نجح جدًا في الآخر.

كمان أحمد فهمي قال عن "ورقة شفرة" في لقاء سابق: مكانش حد عايز ينزل الفيلم في الأول ولما عملوا مشاهدة له مفيش موزع كان موافق على الفيلم واتقال ده آخره ينزل على التليفزيون على أي محطة وخلاص وهيبقى كفاية على الولاد دول.

وكمّل "فهمي" وقال إن السبب في ده إن مكانش حد فاهم الإفيهات اللي في الفيلم ولا طريقة التهريج الجديدة، لحد ما اقتنعت بيه إسعاد يونس وقررت توزعه.