حوار مع سارة الشاذلي عن فيلم "بنتك"

صناعة الأفلام الوثائقية صعبة.. ولما تبقى وثائقية عنك وعن علاقتك بأهلك.. الصعوبة بتزيد.

المخرجة سارة الشاذلي بتقدملنا فيلمها "بنتك" واللي بيشارك في مهرجان القاهرة السينمائي الدولي 2026 في مسابقة الأفلام الوثائقية الطويلة. الفيلم بيحكي عن علاقتها بأمها المنتجة ماريان خوري وإزاي اتطورت واختلفت، إزاي كانت غضبانة من انشغال أمها عنها احيانًا وإزاي أمها دفعت تمن كبير عشان تشتغل في السينما وبتطور علاقة سارة بوالدتها ماريان خوري وهي في طريقها إنها تكون أم هي كمان.

قابلنا سارة وسألناها عن الفيلم.

"أنا كنت بعمل فيلم عن المربية لاقتني بعمل الفيلم عن أمي"

عارف لما تكون بتلف حوالين نفسك بتدور على حاجة وهي قدامك.. دي كانت فكرة الفيلم ده مع سارة الشاذلي، "سارة قدمت فيلم قصير اسمه "إيزابيل" عن المربية بتاعتها وبعدها كانت بتحضر عشان تعمل فيلم عن المربية بتاعتها وثائقي اسمه "البحث عن هودي" وكانت كل ما ترجع مصر من دراستها وشغلها بره، تعمل انترفيو مع مامتها تطلع الكاميرا وتسألها أسئلة.. عشان تعمل فيلمها عن المربية.. لكن بعد ورش عن السينما ومحاولة تطوير للفيلم اكتشفت سارة إنها في الحقيقة بتعمل فيلم عن أمها!

أرشيف كتير موجود عند العيلة، وانترفيوهات صورتها سارة.. كل ده كان مادة للفيلم اللي بدأت سارة تكتبه وترتبه وتعمله مونتاج وتكتشف وقتها إيه اللي ناقص فتنادي على مامتها وتقولها يالا نصور كذا وكذا وزي ما بتقولنا "مافيش ضغط مافيش إنتاج مافيش الكلام الكبير ده.. مفيش اصلا فلوس.. أنا بعمل كل حاجة لوحدي."

"أنا عملت الفيلم ده عشان كنت محتاجة اعمله"

الأفلام الوثائقية اللي بتدور عن حياة شخصية بتتقابل احيانًا بهجوم.. احنا مالنا ليه بنشوف ده؟ أو بالعكس بنتعلق بيها وبنحس إنها جزء مننا وعن ده بتقولنا "سارة": "فيه ناس بتحس طب ما تروحي تشوفي دكتور نفسي وماتعمليش فيلم.. وناس بتتأثر وبتحس إنهم عايشين معاكي.. أنا مش عايزة اتوقع رد فعل الجمهور، أنا عملت الفيلم ده عشان كنت محتاجة اعمله وعملته بأكتر طريقة صريحة.. وخدت مني 6 سنين عشان كنت عايزاه يطلع كويس.. الناس ممكن تضايق. تتعصب.. يعجبها أو لأ.. المهم إني عملته كويس لكن ماقدرش اعمل فيلم وبعدين اروح استخبى لازم أواجه الناس."

"لما تخلف هتفهم!"

فيلم عن بنت غضبانة من أمها وحاسة بغيابها.. كان هيبقى حاجة تانية لو سارة ماكنتش بقت أم!

وعن ده بتقولنا "سارة": "كان لازم استنى إني أمر بتجربة الأمومة والحمل والولادة والتربية عشان الفيلم يكمل.. في الرحلة دي فهمت حاجات كتير عن أمي وعن حياتها وعن صعوبة الأمومة وخلاني اطلع من البنت الصغيرة اللي عندها غضب وبس وافهم حاجات كتير.. وخلاني اشوف أمي بطريقة مختلفة".

في فينسيا عرضت سارة فيلمها في مراحل تطويره، وهناك قابلها مخرج كان أب جديد وقالها استني شوية ماتعمليش الفيلم دلوقتي، عشان فيه حاجات كتير هتتغير لما تخلفي، وفعلا سمعت كلامه وماكملتش الفيلم غير لما خلفت بنتها وكملت سنة ونص وهنا حست إنها خلاص ممكن تبدأ تقفل فيلمها.

"هتقدر تكسر الدايرة؟!"

لو قريت لحد هنا أكيد انت حاسس الفيلم بيتكلم عن تروما طفلة حاسة بغياب والدتها.. مش قادرة تتعايش مع ده وتكمل فيه، وعشان كده كان لازم نسأل سارة سؤال شخصي.. هل هي شايفة إن الأجيال لازم تكسر الدايرة وتغير حاجة يمكن حياتهم تتغير.. وسارة قالتلنا: "الموضوع صعب وبياخد سنين طويلة إن الواحد يواجه أهله ويحاول يغير ويشتغل على نفسه.. أنا كنت محتاجة أعمل ده.. كان احتياج جامد جدًا ومكنتش عارفة اعيش كده من الآخر، لما حسيت إني حليت حاجات وفهمت حاجات.. ساعتها حسيت إني جاهزة أبقى أم."!

ولأن الفيلم كان سبب إنها تكسر الدايرة.. فهنا بس قدرت سارة تحس إنها خلاص مش عايزة تعمل أفلام وثائقية تاني..

"الفيلم ده خلاني أقفل كتاب بحاله في حياتي، يعني خلاص هبطل أفكر في الماضي وفي طفولتي، وفي أمي وعلاقتي معها وحياتها. دلوقتي أنا جاهزة أبتدي أفكر في حاجات تانية في السينما وفي الحياة. خلاص مش عايزة أعمل أفلام تسجيلية تاني، حاسة إن أنا مريت باللي أنا محتاجة أمر به، ونفسي أعمل سينما روائية دلوقتي."

"كان فيه ضغط عشان عيلتي سينمائية.. بس انا قعدت 10 سنين عقبال ما لاقيت نفسي في العالم ده"

إنك تكون موجود في بيت فني، يمكن يكون ميزة وبيديك صلاحيات وفرص كتير، لكن كمان بيحط عليك ضغط إنك أكيد هتشتغل في السينما أو هتبقى زيهم.. أو هتشتغل بطريقتهم.

سارة بتحكيلنا إن وهي صغيرة ماكنتش مقررة هتطلع إيه ولما مامتها اقترحت تدرس film studies أو سينما وافقت لكنها ماكنتش عارفة هتعمل ايه؟ كانت كل ما تنزل مصر بتصور وبتعمل مشروعاتها وأفلام قصيرة وأبوها كان بيقولها هتقدري تعملي ده.. وبعد وقت شغل في المجال في مصر سابته واشتغلت في الأرشيف في فرنسا وبعدين قررت ترجع تاني تدور على علاقتها بالسينما وقدمت في مدرسة في كوبا وهناك بقى حسب كلامها: "كنت عايزة اشوف أنا هعمل إيه في المجال ده وهكمل ولا مش هكمل، وهناك جالي ردود إني فعلا بحب السينما ومش مهم شاهين أو أمي.. أنا هلاقي علاقتي مع السينما وهتبقى مختلفة عن كل حاجة وبس" وبتكمل وتقولنا عن التوقعات "آه طبعا كان فيه ضغط وكان فيه توقعات بس الحمدلله خلصت من كل ده بس قعدت 10 سنين عقبال ما الاقي نفسي في العالم ده".

"تخيل تلاقي كل حياتك متسجلة على هارد درايف ومتصورة؟!"

أرشيف كبير، كاميرات في كل حتة دايما في البيت.. دي كانت حياة سارة، وعشان كده كان لازم الفيلم يتكتب كويس ويترتب عشان تقرر إيه مهم وإيه مناسب لفيلمها، وكان لازم عين تانية تشوف معاها الفيلم وهنا كان دور مونتيرة الفيلم فاستن، لكن طبعا أثناء المرور على الأرشيف اكتشفت سارة حاجات جديدة: "اكتشفت مثلاً أن أبويا كان حنين قوي معانا في الأرشيف، واكتشفت أن أمي كانت دايماً متطورة من زمان في الأرشيف، اكتشفت أيه الكاميرا كانت موجودة في كل حتة، ده كان برضو حاجة غريبة، تخيلوا أنتم مثلاً تلاقوا hard drive بكل حياتكم متصورة من وأنتم صغيرين، أكيد هكتشفوا حاجات عن أهاليكم، وعن نفسكم، عن القاهرة، وعن كل حاجة".

هل فيلم بنتك هو احكيلي 2؟

أي حد يعرف ماريان خوري وشاف فيلمها "احكيلي" ممكن من الكلام والحوار يحس إن فيلم "بنتك" بيدور في نفس الفلك أو جزء تاني من فيلم "احكيلي" لكن سارة بتقولنا "أمي كانت محتاجة تفهم حاجات.. وأنا كنت محتاجة افهم حاجات فعملنا الفيلم.. لكن في التفاصيل كل حاجة مختلفة، الخطوات والشغل حتى شاهين في فيلمها مختلف جدًا عن فيلمي".