حوار مع ستوديو Mimic وتفاصيل أكتر عن لوك محمد فراج في "القصة الكاملة"

كلنا شوفنا محمد فراج بشكل مختلف تمامًا في حكاية "لعبة جهنم"، ضمن حكايات مسلسل "القصة الكاملة" اللي بتتعرض دلوقتي، وهو عبارة عن سلسلة حكايات مأخوذة من قصص صانع المحتوى سامح سند.

فراج ظهر في المسلسل بملامح مختلفة، هتاخد بالك إن في حاجات كتير متغيرة في شكله بس مش هتقدر تلمس أو تحدد الاختلاف ده، لأنها تفاصيل صغيرة كتير جنب بعض طلّعت الصورة النهائية اللي شوفناها.

اتكلمنا مع  الستوديو اللي عمل الـspecial effects والميكب المخصص لشخصية فراج الجديدة في مسلسل القصة الكاملة، وهو ستوديو mimic من تأسيس عمرو عبد الله، واتكلمنا مع ميخائيل وجيه مدير الستوديو، اللي كشفلنا تفاصيل شكل فراج.

كواليس من دور محمد فراج في مسلسل القصة الكاملة

ميخائيل في البداية حكالنا عن الشغل اللي عملوه بالظبط، وقال: "اشتغلنا على شكل محمد فراج من خلال أكتر من حاجة، أولًا ركبنا على شعره الأساسي صلعة عشان تسمحلنا نركب عليها شعر تاني، غير الدقن مكنتش دقنه الحقيقية، برضه شيلناها وركبنا دقن تانية مناسبة مع الشخصية، غير زبيبة الصلاة، وآخر حاجة هي ألوان وشه اللي قصدنا إنها تكون باهتة وتحسسنا إنه دايمًا مرهق ومهموم."

وأكيد الشغل على مشروع كبير زي "القصة الكاملة"، وعلى الشكل النهائي اللي شوفناه لـ فراج، مكنش سهل ومتوقعين إنهم واجهوا صعوبات كتير، وميخائيل أكد ده وقالنا إن أصعب حاجة عدوا بيها كانت إنهم كل يوم بيضطروا يبنوا الميكب من الأول، واللي كان بياخد منهم 3 ساعات ونص، ما بين تفاصيل كتير في الشعر والدقن والوش، وفكرة إنهم يقعدوا الممثل تحت إيديهم الوقت ده كله، مكنتش سهلة.

ومن الحاجات الصعبة اللي واجهوها، هي الدقة في كل تفصيلة، توزيعة شعر الدقن بشكل عشوائي لكن في نفس الوقت منمق ويحسسك إنه طبيعي، غير إن المخرج إسلام خيري كان بياخد لقطات قريبة كتير -حسب تصريحات ميخائيل- فده كان بيزود المسؤولية عليهم إن لازم الشكل يطلع طبيعي 100%.

واختتم ميخائيل كلامه معانا، بإن النجاح الأساسي لمهنتهم هو إن الجمهور مياخدش باله إن في ميكب أصلا معمول، يحس إن كله طبيعي بشكل كبير، وأكد كمان إنهم كفريق عمل في الستوديو لازم بيقرأوا السيناريو قبل ما يبدأوا شغلهم عشان يعرفوا أبعاد الشخصية اللي هيشتغلوا عليها.

مسلسل القصة الكاملة

مسلسل "القصة الكاملة" هو سلسلة حكايات بتستعرض قصص صانع المحتوى سامح سند، اللي بيطلع يحكيها في سلسلة فيديوهات على السوشيال ميديا بعنوان “القصة الكاملة”، والمسلسل من إنتاج مجدي الهواري، وكل حكاية بيكون ليها مخرج ومؤلف مختلفين، وحكاية لعبة جهنم اللي بيقوم ببطولتها محمد فراج، هي من تأليف نجلاء الحديني، ومن إخراج إسلام خيري.