"أجورا" حكاية أول مدرسة ثانوية للإعلام والسينما في مصر

فاكر لما خدت الشهادة الإعدادية؟ غالبًا كنت بتفكر في المكافأة بتاعتك يا ترى هتجيب عجلة ولا هتجدد الموبايل، بس ماظنش أن مرحلة ثانوية عامة كانت بتشغل تفكيرك، أصل آيه اللي هتفكر فيه؟ هو يا دوبك هاتدخل علمي ولا أدبي. بس النهارده في 2026 الموضوع مابقاش بيمشي بالسهولة دي، لأن بجانب الثانوية العامة بقى في سكك كتير ممكن تمشي فيها من مدارس التكنولوجيا التطبيقية بفروعها ومجالاتها المختلفة، وواحدة من المجالات دي هي دراسة السينما والإعلام، ودي قصتنا النهارده.

بالنسبالي الموضوع بدأ يوم 22 يوليو، لما شركة أجورا نزلت أول بوست وأعلنت فيه إطلاق أول مدرسة فنية ثانوية متخصصة في صناعة السينما والإعلام تحت عنوان مدرسة أجورا، ولأن الموضوع ممكن يبان غريب شوية، كان لازم نتكلم مع فريق مدرسة أجورا ونفهم منه تفاصيل أكتر وأكتر عن المشروع ده.

البداية: مالقناش فنيين فجبنا طلبة:

فريق أجورا بيحكيلنا وبيقول إن الفكرة بدأت لما هما بدأوا يواجهوا مشكلة في شغلهم اليومي، وهي إن في السينما في نقص كبير في الفنيين المؤهلين، فمع كل مشروع كانوا بيشتغلوا عليه، كانوا بيلاقوا إن كتير من الناس بتتعلم المهنة بعد دخول سوق العمل، من خلال التجربة والخطأ.

ومن هنا بدأ السؤال: ليه نستنى الطالب يخلص ثانوية عامة عشان يبدأ يتعرف على المهنة؟ وليه ما نبدأش تعليمه من بدري؟

فريق أجورا قرر يجاوب السؤال بنفسه، وبعد أكتر من سنتين شغل ما بين دراسة نماذج مدارس السينما الفنية في أوروبا، وبناء المناهج، والتواصل مع الجهات المختلفة، وتطوير رؤية متوافقة مع نظام مدارس التكنولوجيا التطبيقية. بتخرج مدرسة أجورا للنور، والتقديم بيتفتح لطلاب الشهادة الإعدادية لأول مرة السنادي.

بحب السيما بس مش عايز أمثل:

واحدة من أهم الأفكار اللي المدرسة بتسعى تقدمها، إن مجال السينما والإعلام أكبر بكتير من اللي بنشوفه على الشاشة، والفريق اللي ورا الكاميرا كله أدوار مهمة، وهنا أنت هتتعلم الأدوار دي في أقسام المدرسة السابعة (الإضاءة، والكاميرا، والديكور، وتصميم الأزياء، والمكياج والمؤثرات الخاصة، وصيانة معدات الكاميرا، والصوت).

بحسب فريق المدرسة، فالدراسة، هتجمع بين الجانب النظري والتدريب العملي، بحيث يتعرف الطالب بشكل مباشر على طبيعة المهن المختلفة في مواقع التصوير والإنتاج، وده بيخلي التجربة مختلفة عن فكرة دراسة السينما باعتبارها مادة نظرية بس.

ليه تدخل أجورا لما ممكن تدخل معهد سينما؟

رغم إن المدرسة بتقدم تعليم متخصص في السينما من سن الثانوية، صناعها مش شايفينها بديلًا عن معهد السينما أو كليات ومعاهد الفنون والإعلام. بالعكس، "المدرسة ممكن تكون بداية الطريق قبل التعليم الجامعي"

والطالب يقدر بعد التخرج يكمل تعليمه الجامعي بشكل طبيعي جدًا، وفي نفس الوقت يكون خرج من المدرسة وهو عنده أساس عملي ومهارات تقنية ومهنية يقدر يشتغل بيها، وده، بالنسبة للقائمين على التجربة، واحد من أهم الاختلافات بينها وبين المسار التقليدي"الطالب مش هيبدأ من الصفر بعد الجامعة، لكنه هيدخل المرحلة الجامعية وهو بالفعل عنده معرفة أولية بالمجال اللي اختاره"

في النهاية، الطريق من بعد الإعدادية زي ما أنت شايف بقى مليان اختيارات، ولو أنت بتحب السينما فـ أجورا بقت فرصة إن حلمك ما يتأجلش، أو على رأي فريق المدرسة "فيه جيل كامل كان محتاج الفرصة دي، وإحنا هدفنا إن الجيل الجديد يبدأ من المكان اللي كان غيره يتمنى يوصله، بحيث يركز على الإبداع بدل ما يضيع وقته في تعلم الأساسيات بطريقة صعبة"

ومين عالم مش يمكن دي تكون البداية، اللي هتخلي هوليوود الشرق ترجع من تاني؟