"إزاي الديكور هو "النص التاني" من القصة؟ حوار مع مهندس أحمد عباس

الفكرة بدأت من الورق. مهندس الديكور أحمد عباس بيقولنا إن أول خطوة دايمًا بتكون قراءة السيناريو ومحاولة تخيل العالم اللي الشخصيات عايشة فيه: ساكنين فين؟ بيوتهم عاملة إزاي؟ جيرانهم مين؟ والمنطقة اللي حواليهم شكلها إيه؟ من هنا يبدأ يتكون شكل المكان في الخيال قبل ما يتبني على أرض الواقع.

لكن في عمل تاريخي زي مسلسل النص بيعرض شكل مصر في فترة الثلاثينات والأربعينات، الخيال لوحده مش كفاية. عشان كده الفريق اعتمد على مراجع كتير من صور أرشيفية حقيقية لناس عاشت في مصر وقتها، وكتب زي "عصر الفتوات" و"عمارة مصر الحديثة"، بجانب دراسة شكل العمارة الإسلامية في الأحياء القديمة. 

"العمل التاريخي بيقوم على حاجتين الصورة والورق فأهم حاجة المصداقية إن الجمهور يقتنع إني بقدمله فعلًا الفترة دي، احنا بنعمل عمل بيأرخ الفترة دي في مصر لما أعمل صورة حلوة بحس إني بحفظ بيها التاريخ في ذاكرة المشاهد، وبكده بخش لقلبه.

المهندس أحمد عباس، مصمم ديكور مسلسل النص

عالم واحد مش كفاية.. عارف ليه سموه النص؟

"النص التاني" عوالمه كانت متحددة بين منطقتين أساسيتين، هما: شارع عماد الدين والمنطقة الإسلامية، ورغم إن الموضوع يبان في بدايته بسيط إلا إن الديكورات بدأت التحضيرات فيها من شهر أكتوبر 2025 عشان وعلى مدار 6 شهور يكون اتبنى ديكور كامل لمنطقة شعبية في مدينة الإنتاج الإعلامي، مع بيوت لشخصيات المسلسل تتصور فيها المشاهد الداخلي. وفي المقابل، اتعمل شارع عماد الدين بكل تفاصيله من تياترو وكافيهات وقهاوي ومحلات، لأن الشارع وقتها كان مركز للحياة الفنية والمهن الجديدة اللي بدأت تظهر في مصر.

حتى خط الترام اتعمل مخصوص في الديكور، واللي كان بالنسبة لفترة الأربعينات حاجة حديثة نسبيًا وكانت بتديره شركة فرنسية. 

أحمد عباس قالنا إن الجزء الأول من المسلسل كان بيعتمد أكتر على الشوارع واللوكيشنات الخارجية، ولكن الجزء التاني اتصور في 175 ديكور منهم تقريبًا 100 داخلي. وده معناه إن أماكن كتير اتعملت من الصفر، زي المعمل المستقبلي والجريدة والترام وحي لندن اللي اتبنوا من أول وجديد.

العمل التاريخي دايمًا متعب ومش سهل، لأن معظم الحاجة مش موجودة وبتتعمل، مع كل ديكور في مرحلة تعب وتفكير إزاي هنوصل مشاعره.

لما عملنا ستوديو صوت قعدنا ندور مين أسس أول شركة صوت في مصر وإزاي طلعت، لدرجة إننا روحنا مبنى الإذاعة والتلفزيون عشان نشوف المعدات والأدوات، وأجرنا أدوات من ستوديو مصر وستوديو النحاس.

المهندس أحمد عباس، مصمم ديكور مسلسل النص

وعشان مافيش مجال للصدفة، كل تفصيلة في مسلسل النص كانت متحددة كويس أوي، حتى الفترة الزمنية نفسها كان ليها دور في شكل الديكور. فالجزء التاني بيبدأ مع دخولنا لفترة الثلاثينيات، واللي بدأ يظهر في العمارة المصرية أسلوب الآرت ديكو، وده انعكس على ديكورات النص التاني، خصوصًا الأماكن المرتبطة بالطبقات الغنية أو الأرستقراطية.

طريقة عمل سقسوقة عبد العزيز النص:

بشمهندس أحمد قالنا إن عبدالعزيز النص اللي بيقدم دوره أحمد أمين كانت بالنسباله شخصية محورية بسبب ظهورها في معظم الأحداث، فكان لازم الديكور يواكب تحركاته وتغيراته. وكل مكان بيظهر فيه لازم يعكس حالته: مرة رئيس تحرير في جريدة، ومرة شخص متخفي. عشان كده كان لازم كل ديكور يتصمم بطريقة راكبة على الشخصية نفسها وده جه بعد اجتماعتنا مع قسم الملابس والمخرج ومع أحمد أمين نفسه.

بس بما إن بناء عالم تاريخي مش مجرد مباني ولا هو شوية أثاث بيتحط عشان يملأ الكادر. فكان لازم نعرف إيه التفاصيل الصغيرة اللي خلت "النص" مسلسل مختلف عن أي مسلسل تاريخي تاني. وده عشان نعرفه بشمهندس "عباس" حكالنا عن كواليس التحضيرات وإن إزاي الفريق كان بيدقق في كل حاجة تقريبًا من شكل اللمبة، ونوع الأثاث، وحتى علبة الكبريت. لأن تفصيلة صغيرة جدًا ممكن تفضح العمل كله لو كانت من زمن مختلف.

وواحد من المشاهد اللي مش بينساها أحمد عباس في الجزء الأول هي لما اتعرض في مشهد لحارة شعبية يفطة لإعلان كونياك أوتار، واحد من الجمهور بعتله وقاله يا ولاد اللذينة حتى الإعلان فاكرينه؟ أنا جدي كان دايمًا بيحكيلي عن أوتار واللي كان بيتقال عنه كونياك أوتار للبنت المهذبة.

"يا دعوة أمي" بين أول وآخر عمل:

أحمد عباس قبل ما يشتغل على ديكور مسلسل النص هو سبق وقدم ديكور مسلسل جزيرة غمام، وسوق الكانتو، وفي الـ لا لا لاند، وغيرهم. ورغم خبرته الكبيرة دي فهو قالنا الخوف بيبقى موجود في كل مرة، كأنه بيعمل أول ديكور في حياته. يمكن لأن الشغلانة دي معتمدة على حاجة واحدة طول الوقت إنك تلاقي حلول وتستخدم خيالك عشان تبني عالم كامل من لا شيء.

ومسلسل ديكوره كبير ومتشعب زي مسلسل النص كان محتاج تركيز وإتقان كبير وده اللي وصل فريق العمل أنه يكون أكتر من 250 شخص بين مهندسين ومساعدين ومنفذين لديكورات اتصورت في أسبوع، وديكورات خدت من شهر لشهر ونص شغل زي الديكورات الكبيرة في شارع عماد الدين والمنطقة الإسلامية.

"الديكور والملابس والصورة نجم زي العمل بالظبط لو ماتعملش بالشكل الصح هتحس بفقر في الصورة، أنت ممكن بمشهد واحد فيه تليفون وآلة كاتبة وعلم يغنيك عن كلام كتير، فبحس 

إن الديكور ده شئ بيكمل الصورة.

المهندس أحمد عباس، مصمم ديكور مسلسل النص

في النهاية، "النص التاني" بيرجع يفكرنا إن الصورة لما تكون متكونة صح على أساس حقيقي وديكور ظهوره في كل كادر سببه مدروس، ساعتها المسلسل بيتصدق وبيتحول من مجرد مسلسل صورته حلوة، لذاكرة بصرية لفترة كاملة من تاريخ مصر عايشة مع الجمهور كأنها لقطة من زمن حضروه فعلًا.