حوار مع محسن العشري صانع مبادرة "يلا نظلل أسوان"

بس كان أمر واقع ونظرًا لـ طبيعة البلد وموقعها جغرافيًا أهلها حاولوا بتأقلموا على الوضع ده في الصيف، لكن "العشري ستوديوز" كان ليهم رأي تاني، محسن وحسن العشري أخين أسسوا "العشري ستوديوز" وهي مكان بيجمع عدد كبير ومتنوع من الورش لمختلف الحرف اليدوية، قرروا في فيديو نشروه، إنهم يعلنوا عن فتح باب التطوع لمبادرة بـ اسم "يلا نظلل أسوان"، كانت الأسئلة كتير حوالين الموضوع.

علشان كدة عملنا حوار مع "محسن العشري" كلمنا فيه أكتر عن المبادرة وتفاصيل مراحلها المختلفة، ورحلة مليانة بـ شغف هتعيد الناس من جديد في شوارع أسوان في الصيف. 

وقال محسن العشري بداية الحوار: "يلا نظلل أسوان" فكرة جتلنا من معاناة أهل أسوان من الحر الشديد في الصيف وإنهم في شهوره بيطلعوا من بيتهم 6 الصبح ويرجعوا قبل الضهر يفضلوا قاعدين في البيت لحد المغرب من شدة الحرارة، فقررنا في العشري ستوديو نعمل المبادرة علشان نسهّل على أهل أسوان الخروج في الصيف، كمان إحنا استلهمنا الفكرة من مجموعات في إسبانيا والمكسيك، عندهم بيئة صحراوية ودرجة الحرارة عندهم عالية زي أسوان وعملوا حاجة شبه المبادرة، فـ اتواصلنا معاهم وهما قرروا يساعدونا بدون مقابل.

وغير الأهداف اللي هتتم بمجهودات المتطوعين الذاتية، في كمان أهداف العشري ستوديوز هيحتاجوا فيها دعم وتسهيلات من محافظ أسوان وبعض الشركات، وقال محسن: "عايزين نصلح الصرف الصحي في قرى أسوان لأنهم لحد دلوقتي بيستخدموا مياه "البيارة" ودي بتعمل مشاكل صحية كتير، تاني هدف هو تصليح الشوارع ونحط حلول لمقالب الزبالة هناك لأنها موجودة بشكل بيعيق التحرك في كتير من الأحيان، وحابين كمان بناء مدارس في القرى اللي بتعاني من قلة المدارس، زي جزيرة "هيسا" في غرب أسوان اللي مفيهاش غير مدارس ابتدائية فبيكون إجباري على الأطفال إنهم يخرجوا منها ويسيبوا قريتهم علشلان يلتحقوا بمدارس في قرى تانية وده مرهق جدا عليهم. 

محسن العشري بيقولنا إنهم في المبادرة وصلوا لـ حوالي 350 متطوع، أشخاص حابين يساعدوا من غير أي مقابل وأهل أسوان نفسهم بيساعدوهم بـ تقديم أكل وبيعرضوا عليهم يباتوا عندهم ببلاش.

وكمّل محسن العشري وقالنا: "أهل أسوان من أجمل الناس في العالم ورحبوا جدا بفكرة المبادرة وساعدونا من أول يوم، والمبادرة هتتم مراحلها على مدار 3 شهور، أول مرحلة هتبدأ في شهر 6 وهي مرحلة "التجميل والتشجير والتظليل" لأسوان.

وعن العشري ستوديوز بشكل عام، حكالنا محسن العشري الموضوع بدأ إزاي وليه قرروا يدوا ورش بكم كبير ومتنوع في عدد مختلف من الحرف اليدوية، كلها معتمدة على حركة الإيد والابتكار، وقال محسن: "أنا نحات وأخويا حسن برضه بيحب الحرف اليدوية، والبيت اتبهدل في بداية شغلي فـ جدتي ادتني مفتاح بيتها إني أروح أشتغل هناك وجددنا البيت وبدأت أدّي ورش هناك وبعدين قررنا نكبّر الورشة ونخليها مساحة لشغف الفنانين، ودلوقتي إحنا تيم مكون من 60 فنان بندي ورش.

ومن أغرب الورش اللي قدمناها كانت ورشة "كحك العيد"، وورشة "تعليم المحشي"، وبنحاول دايمًا نقدم ورش مختلفة لأن بنسمع جملة "بتوع اليومين دول مبيعرفوش يعملوا حاجات زمان".