فريد قطب مصور مصري وثق مونديال 2026 بكاميرا عمرها 100 سنة

"قطب" قرر إن تغطية كأس العالم السنادي تكون مختلفة عن أي تغطية عملها قبل كده، عشان كده قرر يستخدم كاميرا بترجع لسنة 1930 ميعاد أول دورة كأس عالم في التاريخ، واللي بالصدفة يكتشف إن كاميرا Zeiss Ikon Ideal اللي بيستخدمها سبق وفعلا وصوّرت المنتخب المصري في بطولة 1934، ودورة الألعاب الأولمبية ببرلين عام 1936.

"أنا غطيت مونديال 2018 و2022، فقررت إن النسخة التالتة لازم تبقى مميزة. عشان كده عملت فيلم وثائقي اسمه Project 1930، بستخدم فيه نفس نوع الكاميرات اللي صورت أول كأس عالم في أوروجواي."

فريد قطب، مصور صحفي

إنك تلاقي كاميرا شغالة من سنة 1930 ماكانش سهل. وبعد رحلة بحث طويلة، وصل "قطب" للكاميرا Zeiss Ikon Ideal المناسبة، أو "رمانة" زي ما بيحب يسميها.

"أول مرة أرتبط بكاميرا بالطريقة دي. بحس إني بفسحها كأنها بنتي. سميتها رمانة، لأن لما جبتها كانت في بوكس مصدي وشكله وحش، لكن من جوه كانت جميلة ومرتبة زي الرمان. حتى في الطيارة بقعدها جنبي عند الشباك وبفرجها على العالم."

فريد قطب، مصور صحفي

"قطب" حكالنا إن التجربة نفسها ماكنتش سهلة، "التصوير بالكاميرا القديمة صعب جدا أكتر مما نتخيل" وده لأن التحدي المرة دي هو إنك إزاي تلحق تصور صورة ثابتة ومناسبة في ماتش احداثه بتتغير في أقل من أجزاء من الثانية بكاميرا بيرجع عمرها لأكتر من 100 سنة؟

"في العادي معاناتي إني بصور كتير وبعدها أختار. هنا المعاناة إن لازم أظبط الفوكس يدوي، وده بياخد دقيقة أو دقيقة ونص. على ما أكون خلصت، اللاعب يكون جاب الجول واحتفل وروح البيت. بدل آلاف الصور في المباراة، بطلع بعشر صور بس. فبظبط الفوكس على حتة، وبقف أستنى رزقي."

فريد قطب، مصور صحفي

وفي تغطيته لماتش البرتغال وكرواتيا، "قطب" بيحكيلنا عن الحلم اللي ماتحققش، "كنت متخيل إني هصور كريستيانو بصورة عظيمة، لكن كنت مظبط الفوكس على مكان معين وهو ماجاش. أول ما غيرت المكان، راح هو للمكان الأول، فضاعت اللقطة وكنت متضايق جدًا."

مشروع فريد قطب رجّعنا بالزمن لأول مونديال، وخلانا نتخيل إزاي كان المصورين وقتها بيوثقوا لحظات بقت جزء من تاريخ الكورة. ولسه الحكاية مكملتش، لأن فيلم Project 1930 هيحكي تفاصيل الرحلة كاملة. ولحد ما ينزل قولنا إيه أكتر لقطة من كأس العالم كنت تتمنى تتصور بكاميرا عمرها 96 سنة؟