دراسة: العزوبية أخطر من السمنة

موقع "زحمة" ترجم عن جرنال "نيويورك بوست" دراسة مهمة، أو على الأقل مهمة بالنسبالنا، الدراسة دي بتقول إن العزوبية أخطر من التخن وأمراض السِمنة، يا ساتر يا رب! الدراسة أكدت إن العزوبية حالة خطرة على صحة الإنسان، وإن الأشخاص اللي علاقاتهم الاجتماعية سيئة بيموتوا أسرع، وده بعد ما عملوا اختبارات على 218 طالب في أمريكا بيمثلوا عينة الدراسة.

الباحثون اكتشفوا إن العزلة الاجتماعية بتزود خطر الموت بنسبة 50%، لكن أمراض السِمنة بتزودها بنسبة 30% بس. الناس دي من الآخر بتقولك إن الجواز بيطول العمر، وده عكس المتوقع وعكس اللي ناس كتير مؤمنين بيه، بس أظن ده هيحسن موقف الأمهات اللي بيقولوا لعيالهم طول الليل والنهار "عاوزين نفرح بيكم".