"داليا" و"عمر" بيلفوا مصر في رحلة الـ 60 يوم

أعمل فرح كبير ولا أسافر بالفلوس دي برّه مصر؟ "داليا الديباكي" و"عمر عطية" كان ليهم رأي تاني وبدل ما يسافروا ويلفّوا برّه، قرروا يلفّوا مصر بعيدًا عن المناطق المعروفة والجذَّابة.

الزوجين "داليا" و"عمر" قرروا يلفّوا مصر ويوثَّقوا رحلة الـ 60 يوم من خلال صور على انستجرام ومستقبلًا هيحكوا أكتر عن الرحلة في كتاب من تلات أجزاء. الجزء الأول هيبقى عن الأماكن غير المعروفة اللي في القاهرة، الجيزة، اسكندرية وساحل البحر المتوسط. أما الجزء التاني هيقتصر على الفيوم والصحراء الغربية، الجزء التالت والأخير هيبقى شامل معالم الصعيد ومُدن البحر الأحمر. 

"عمر" اللي عاش عمره كله في الكويت بينسب الفضل في إلهامه فكرة الكتاب لوالده اللي زرع جواه حب الوطن وعرَّفه ضرورة الانتماء إليه مهما سافر وعاش في بلاد تانية، وكان بيحرص كل صيف إنه ينزِّل "عمر" واخواته مصر عشان يتعرَّفوا أكتر على بلدهم. وكان دايمًا بيقوله "أيًا كانت البلد اللي هتروحها تدرس أو تشتغل، هتفضل مصر هي بلدك الوحيدة".

إلى جانب حبه الشديد للتصوير، "عمر" شايف إن مبادرة د. "هشام زعزوع" وزير السياحة السابق #ThisIsEgypt كانت لها أثر كبير عليه وحفِّزته لبدأ الرحلة. كذلك تشجيع "زعزوع" المستمر للشباب لتوثيق رحلاتهم في مصر والإشارة لمعالمها السياحية.

في البلد اللي بتمتلك ثلث آثار العالم، "داليا" و"عمر" حلمهم إن السياحة تبقى مادة أساسية بتتدرِّس للأطفال زي في تايلند وماليزيا وبلاد تانية كتير. 

تقدروا تتابعوهم أكتر من خلال انستجرام