مش بس كتب.. إيه اللي مستنيك في الدورة الـ 57 من معرض القاهرة للكتاب؟

وبما إن الدورة الـ57 من معرض الكتاب بدأت النهارده، ومستمره لحد يوم 3 فبراير، في مركز مصر للمعارض والمؤتمرات الدولية بالتجمع الخامس. فجه الوقت تعرف إزاي تستفيد من المعرض صح من غير ما تضيع وقتك.

في البداية شخصية المعرض السنة دي هي الأديب نجيب محفوظ، تزامنًا مع مرور 20 سنة على ذكرى وفاته، وده تحت شعار مقتبس من كلام أديب نوبل: "من يتوقف عن القراءة ساعة يتأخر قرونًا". وعشان ده تاريخ ماينفعش تضيعه فوزارة الثقافة مقدّمة حقيبة بتضم 15 كتاب من أعمال مختارة لنجيب محفوظ بأسعار مخفضة هتلاقيها في صالة الكتب المخفضة. 

وهناك هتلاقي كتب كتير من دور نشر مختلفة بأسعار أقل. وده غير مبادرة "مكتبة لكل بيت" اللي عبارة عن حقيبة ثقافية فيها 20 كتاب من إصدارات وزارة الثقافة في مجالات متنوعة، وكل ده بـ100 جنيه.

وبعيدًا عن الصالة المخفضة، دور النشر الحكومية زي قصور الثقافة والهيئة القومية للترجمة بيكون فيها كنوز حقيقية: كتب نادرة، مجلدات، ونصوص صعب تلاقيها في أي وقت تاني في السنة، وبأرخص الأسعار. وبعد ما تخلص جولتك دي فأنت قدامك 1457 دار نشر مشارك من 83 دولة مختلفة يادوبك تلحق تعدي عليهم وتستفاد من خصوماتهم والفعاليات اللي بيقدموها وتعرف مواعيد حفلات توقيع كتابك المفضلين.

وطبعا ماتنساش إن في جناح مخصوص للطفل هتلاقي فيه دور النشر المتخصصة في كتب الأطفال، واللي بتقدم كتب وفعاليات مناسبة للأطفال من كتب تلوين وكتب مصورة وعروض حكي وألعاب. يعني أنت قدام فرصة مثالية عشان تحبب طفلك في القراية أو أنت تسترجع ذكرياتك.

وبعد جولة دور النشر، حاول تحضر الندوات والمناقشات اللي بتتعمل على هامش المعرض. وكمان عَدّي على مخيم "أهلنا وناسنا" للتعرف على التراث الثقافي غير المادي للمحافظات، وشوف الأعمال الفنية والحرف اليدوية لذوي الهمم في جناح المجلس القومي لذوي الإعاقة، ومعرض "ديارنا" الموجود قدام صالة 4.

وعشان ما تتوهش ولا تضيع وقت كتير، وزارة الثقافة بالتعاون مع شباب مبادرة "أنا متطوع" عملوا أبليكيشن Book Fair Go. اللي بيوفر خريطة تفاعلية لدور النشر، وإمكانية البحث عن الكتب ومعرفة أماكن الناشرين، وأجندة الفعاليات اليومية، وكمان تنبيهات لتجنب مناطق الزحمة خصوصًا عند بوابات الدخول. الأبليكيشن بيسمح بطلب مساعدة المتطوعين، والإبلاغ عن أي مشكلة أو طوارئ، وطلب الإسعاف. وتقدر تستخدمه بسهولة، لأن ولأول مرة وزارة الثقافة موفرة واي فاي مجاني لزوار المعرض.

السنة دي المعرض مش كتب ومبادرات وبس، ده كمان ولأول مرة فيه منفذ مخصص لبيع حقوق الملكية الفكرية والترجمة، بهدف تشجيع حركة الترجمة بين دور النشر العربية والأجنبية وتوفيرها بتكلفة أقل. وعلى مدار 57 دورة، يقدر معرض القاهرة الدولي للكتاب يحافظ على روحه، ويواكب التغيرات اللي حصلت طول النصف قرن، ويفضل واحد من أكبر وأهم الأحداث الثقافية في مصر والعالم العربي، واللي دايمًا بيشجع الكل على القراءة.