وسط خناة الفتة بالصلصة ولا من غير ، أنت بتأكل إيه؟
في عيد الأضحى دايمًا بنسمع عن خناقة الفتة المفروض تتأكل بالصلصلة ولا من غير، ناس بتقول إن الصلصة بتحليها، وناس بتقول إن حلاوة الفتة أصلًا في بساطتها، ده حتى كلمة فتة جاية من فتافيت الخبز!
بس سواء أنت كنت من محبين الصلصة أو لأ، فدلوقتي جه الوقت إنك تجرب وصفات جديدة، وتشوف الدول التانية بتأكل الفتة زاي؟
1- فتة الحمص:
هي طبق مشهور في سوريا ولبنان وفلسطين والأردن، بيتكون من طبقة من الحمص المسلوق والثوم واللحم المفروم أو المقلي، وبيتغطى بطبقة سميكة من الخبز المحمص أو المقلي، وبيتضاف من فوقه طبقة من اللبن والزبادي بالزبدة أو السمنة للتزيين.
ورغم تشابه المكونات، لكن طريقة التحضير بتختلف بحسب المدينة والتقاليد، فمثلًا:
في سوريا بيخلطوا الحمص المطحون مع اللبن لتحقيق قوام كريمي ناعم، وبيتضاف ليه أحيانًا قطع من اللحم المسلوق أو المقلي وأوقات كمان ممكن يحطوا كوارع.
أما في فلسطين، فالفتة بتكون مخلوطة باللبن مع الطحينة، وغالبًا بتتحضر منغير سمن أو لحمة، وده عشان تحافظ على طابعها كأكلة بسيطة وريفية.
وفي لبنان، فتة الحمص بيكون اسمها "التسقية"، وبتتكون من حمص ولبن وخبز، وغالبًا بتتقدم كوجبة فطار أو سحور، عشان كده بتكون وجبة خفيفة.
2- فتة الدجاج:
فتة الدجاج مختلف على أصلها إذا كانت سورية ولا فلسطينية، بس في الحالتين فطريقة التحضير واحدة، بنجيب قطع فراخ، والخبز المقلي أو المحمص، والزبادي واللبن، وأرز، وصلصلة.
ودلوقتي بقى في افتكاسات كتير لفتة الدجاج، زي فتة الدجاج بالحمص، وفتة الدجاج باللبن، وفتة الدجاج بالأرز.
3- فتة الباذنجان:
تعتبر من أبسط أنواع الفتة فى العالم العربى، بتتكون من باذنجان رومي، وخبز شامي، وعصير ليمون ولبن رايب وطحينة وحمص شام مطحون وزيت زيتون، والثوم، وطبعًا بنضيف البهارات والملح والكمون والفلفل الأحمر والبقدونس.
4- فتة العدس والبصل المقلي:
فتة العدس تعتبر وجبة تقليدية مشهورة في مصر والسودان، وده بسبب قيمتها الغذائية وتمنها المناسب، وهي بتشبه بنسبة كبيرة شوربة العدس.
الفتة بقى بتتكون من عدس مسلوق أو مهروس، والخضروات، والبصل المكرمل، وصلصلة الثوم والليمون، وطبعًا زي أي فتة فلازم يكون في خبز محمص.
5- فتة الشاورما:
طبعًا هي أكلة سورية، مشهورة بيها مطاعم الأكل السوري في مصر، بتتكون من مكعبات من الخبز الشامي، وأرز بسمتى، وقطع من صدور الدجاج، وتقدر تضيف صوص الزبادى والتوابل المختلفة اللى بتديها نكهة مميزة بالكمية اللي بتحبها.
6- فتة الكسكسي:
الكسكسي نفسه أكلة أمازيغية الأصل، ومنتشرة بشكل كبير في المغرب، الجزائر، تونس، وليبيا، وبقت من الأكلات التقليدية في المناسبات، الكسكسي بيتصنع من سميد القمح، وبيُبخر في أداة اسمها "الكسكاس".
أما فتة الكسكسي بقى فهي واحدة من الأطباق المشهورة بيها المغرب، بتعتمد فى تحضيرها على الكسكسى والكوسة وقطع خبز ولحم موزة الغنم، والبهارات، وصلصة الهاريسة الحارة.
7- فتة المكدوس:
فتة المكدوس هي واحدة من أشهر الأطباق الشامية، وتحديدًا في المطبخ السوري الدمشقي، المكدوس هو الباذنجان الصغير اللي بيتحشي بالمكسرات والثوم والفلفل وبعدها بيتخلل في الزيت.
أما فتة المكدوس بقى فبتتكون من المكدوس والخبز المقلي أو المحمص، واللبن، والصلصة الحمراء، وقطع اللحمة.
ودلوقتي بعد ما شوفنا مع بعض وصفات مختلفة للفتة، فجه الوقت إنك تجربها في العيد وتشاركنا إيه أحلى طريقة لعمل الفتة؟
كل سنة وكلنا طيبين عيد أضحى سعيد.
