ازاي تكون جزء من مهرجان السينما في الجونة؟

في أكتوبر من كل سنة بنكون على ميعاد مع حدث فني وثقافي مهم، وهو مهرجان الجونة السينمائي، واللي السنة دي بيوصل لدورته التاسعة، في الفترة من 15 لـ 23 أكتوبر الحالي. فلو ناوي تسافر إجازة الشهر ده، بنرشحلك الجونة أكيد، لأنك ببساطة هتقدر تكون جزء من مهرجان سينما عالمي، وكمان تستمتع بكل حاجة تانية في المدينة. فخلينا هنا نقولك إيه من أنشطة المهرجان ممكن تحب تحضره وتخليه جزء من جدولك في الإجازة.

1- احضر حوار لايف مع منى زكي

واحدة من أبرز فعاليات المهرجان بشكل ثابت هي الحوارات اللي بتعمل لايف مع النجوم وصناع السينما في البلازا أو مركز الجونة الثقافي، وبتكون كمشاهد عندك فرصة تحضر الانترفيو لايف وتشارك بأسئلتك لنجومك المفضلين.

في نسخة 2026 مهرجان الجونة السينمائي هيقدم حوار حي مع النجمة منى زكي، واللي هيدير الحوار المخرج محمد ياسين، وتقدر تكون حاضر وتشتري تذكرتك من موقع Ticketsegypt

2- شوف أفلام عالمية لأول مرة

برامج عروض الأفلام من مهرجان الجونة السينمائي، بتضم كل سنة مجموعة من الأعمال الإقليمية والعالمية، وفي منها أفلام بتكون عرض أول في المهرجان، ودي بتكون فرصة لكل محبي الأفلام إنهم يشوفوا أعمال أوقات كتير مش هيقدروا يشوفوها في السينمات أو على المنصات المختلفة.

عروض الأفلام خلال أيام المهرجان بتكون موجودة في البلازا أو في سي سينما وتذاكرها بتكون متاحة بمواعيد مختلفة على موقع Ticketsegypt

3- احضر ندوات فنية وشارك في نقاشات مهمة عن مستقبل صناعة السينما

لو أنت شخص بيحب السينما، ممكن تحضر ندوات لأهم الصناع والمتخصصين في الصناعة، بيتكلموا خلالها في موضوعات مختلفة، مرتبطة بعلاقة الفن بالجمهور وتأثيرات السينما على المجتمع وحماية صناع السينما من الاحتراق النفسي، وغيرها من الموضوعات اللي مهرجان الجونة عودنا يقدمها في ندواته.

والسنة دي جدول المهرجان هيكون فيه ندوات ونقاشات مهمة تقدر تكون جزء منها وتحضرها، وبرضه تذاكرها زيها زي كل الفعاليات بتكون موجودة على موقع موقع Ticketsegypt

4- استمتع بأفلام كلاسيكية بنسخ مرممة

إعادة إحياء كنوز السينما العربية والعالمية يعتبر من أهم اهتمامات مهرجان الجونة السينمائي، وعشان كده المهرجان دايمًا بيعرض أفلام كلاسيكية قديمة بنسخ مرممة، يعني بتكون عندك فرصة تتفرج على أفلام زمان اللي بتحبها بس بجودة دلوقتي.