12 فيلم ميتفوتوش في مهرجان القاهرة السينمائي 2017

المهرجانات فرصة عشان تشوف سينما مش هتعرف تشوفها في أي وقت تاني، أفلام  لسه ماتعرضتش وأفلام اتعرضت بس مش موجودة أونلاين عشان هي "أفلام مهرجانات"، وأفلام تانية وثائقية مش جماهيرية. السنة دي في مهرجان القاهرة السينمائي، هيتعرض أكثر من 100 فيلم من 15 دولة في المسابقات الرسمية أو على هامش المهرجان، طبعًا أنت كبني آدم طبيعي، استحالة تشوف كل الأفلام دي؛ احنا بنرشحلك 12 بس مختلفين ممكن ماتفوتهمش. 

عروض المهرجان هتكون في الأوبرا وسينما أوديو، ومول العرب وممكن تعرف أكتر من صفحة المهرجان على فيسبوك أو من الموقع. 

The Mountain Between Us 

فيلم افتتاح المهرجان أمريكي للمخرج الفلسطيني الهولندي، هاني أبو أسعد. الفيلم من بطولة  Kate Winslet و Idris Elba، وبيصوَّر لنا فيه هاني حياة شخصين ناجيين من حادث قطار مأساوي، بيورَّينا ازاي بيصارعوا حرفيًا للنجاة.

A Prominent Patient

فيلم من إنتاج التشيك وسلوفاكيا، بيدور في وقت احتلال ألمانيا  لتشيكوسلوفاكيا سنة 1939. بطله دبلوماسي عنده مرض في الأعصاب بيدفعه إنه يعيش في مستشفى عقلي، أشبه بالسجن بالنسباله. هناك هيصارع رغبته في الحياة، وهيقابل الدكتور الألماني شتاين وتدور بينهم علاقة إنسانية وسياسية غريبة.

Apricot Groves 

"آرام" الشاب الإيراني الأرمني اللي هاجر لأمريكا في طفولته، وبيضطر يرجع لأرمينيا لأول مرَّة عشان يعرض على أهله فكرة الارتباط بنبت أمريكية. بس هناك، في رحلة اليوم الواحد، بتحصل حاجات مش متوقعها، لمَّا بيشوف ثقافات دينية وعادات مختلفة.

 Emilia: Breaking Free

ماسمعتش عن دولة ليتوانيا قبل كده؟ في المهرجان ممكن تشوفلها فيلم بيحكي عن "إيميلي" اللي بتنقل من مدينتها الصغيرة للعاصمة في وسط اندلاع ثورة هناك، التغيرات دي كلها بتدفعها لمواجهة أزمات أكبر منها، تخصها هي والمحيطين بيها كمان.

Hostages

الفيلم اللي تم إنتاجه من تلات دول، جورجيا وروسيا وبولندا، بتدور الأحداث سنة 1983، وفي وسط الاستعدادات لفرح "نيكا" و"آنا"، بنكتشف خطتهم للتمرد على تقاليد أهاليهم، واكتشاف العالم الحر والخروج من النظرة جلباب أبيهم.

Piata lod

فاقد الشيء لا يعطيه؟ "جاركا" بطلة الفيلم السيلوفاكي ده عملت كده بالظبط! نتيجة لعلاقتها غير المستقرة بأمها، دفعت نفسها لإنها تبقى أم لطفلين! هتعمل معاهم إيه؟

The Basics of Killing

الفيلم الصربي مالوش أي علاقة بالقتل فعليًا، لكن بيتكلم عن البيوت اللي ممكن تنهار بسبب المشاكل بين الآب والأم. 

محبس

فيلم "محبس" فيلم لبناني أردني مصري، وهو تجربة الإخراج الأولى لصوفي بطرس. الفيلم أغنيته تخليك عايز تشوفه، وحكايته كمان، خصوصًا إنها تخص الحرب الأهلية في لبنان، وبتحكي عن تريز اللي ماقدرتش تنسى قتل أخوها بقنبلة سورية، لحد يوم خطوبة بنتها لما بتكتشف إن عيلة خطيبها سوريين وتبدأ القصة. 

The elephant and the Butterfly

الفيلم البلجيكي عن الأب اللي ساب عيلته لمدة 3 سنين ولما رجع لقى مراته مستنية المربية تقعد مكانها مع بنتهم، والنص ساعة اللي كان مفروض يستنى فيها المربية اتحولت لـ3 أيام لوحده مع بنته.

فوتوكوبي

الفيلم المصري بطولة شيرين رضا ومحمود حميده والتجربة الأولى للمؤلف هيثم دبور والمخرج تامر عشري في الأفلام الطويلة، فاز الفيلم بجائزة أحسن فيلم عربي في مهرجان الجونة ولسه ماتعرضش في السينما، لو شفت إعلانه أو البوستر هتبقى متحمس تشوفه ومستنيه.

Girlhood

الفيلم الفرنساوي إنتاج سنة 2016 عن البنت اللي حياتها اتغيرت تمامًا بمعرفة  بنات جداد فاز بـ11 جائزة مختلفة غير الترشيحات في مهرجانات كتير، وعشان كده بنرشحه تشوفه.

Ali's Wedding

فيلم استرالي عن أبن رجل دين مسلم بيلاقي نفسه مزنوق بين حبه وواجباته ناحية عيلته.