إطلاق تطبيق "كتاب" لتسهيل الوصول لإصدارات وزارة الثقافة

الدكتور عمرو طلعت، وزير الاتصالات وتكنولوجيا المعلومات، والدكتور أحمد فؤاد هنو، وزير الثقافة، أعلنوا عن انطلاق تطبيق "كتاب" بالتزامن مع انطلاق فعاليات الدورة الـ 56 لمعرض القاهرة الدولي للكتاب. التطبيق بيضم حاليًا اًكتر من 2000 كتاب لعدد أكتر من 1000 كاتب ومؤلف في 20 مجال زي الأدب والقصص والسير الذاتية والتاريخ وفروع العلوم المختلفة وبعض التصنيفات التانية.

والدكتور عمرو طلعت، قال إن التطبيق قريب هيكون عليه كتب مسموعة، للناس اللي عايزة تسمع بدل ما تقرأ، وهيتم استخدام الذكاء الاصطناعي في ترجمة الكتب. والدكتور أحمد فؤاد هنو، قال إن التطبيق هدفه تسهيل الوصول للكتب والمحتوى الثقافي من خلال أحدث الوسائل التكنولوجية. وأكد إن التطبيق بيضم مكتبة رقمية ضخمة، بتحتوي على مجموعة مختلفة من الكتب في مجالات المعرفة، من إصدارات قطاعات النشر بوزارة الثقافة.

التطبيق متوفر على جوجل بلاي وآب ستور، وأول ما تدخل عليه هتحتاج إنك تعمل أكونت، علشان تقدر تشوف الكتب الإلكترونية المتاحة على التطبيق، وكمان تقدر تعمل مكتبك المفضلة، وتمييز الكلمات، وإضافة العلامات المرجعية، والبحث عن الكلمات في محركات البحث. وتقدر تقرأ الكتب أون لاين أو تحملهم علشان ترجعلهم في أي وقت.