إطلاق كارت الخدمات الحكومية الموحد والبداية من محافظة بورسعيد

وزارتي التموين، والاتصالات وتكنولوجيا المعلومات، بالتعاون مع هيئة التأمين الصحي الشامل، أعلنوا عن إطلاق كارت الخدمات الحكومية الموحد، لتقديم الخدمات للمواطنين بشكل أسهل، والبداية هتكون من محافظة بورسعيد. الكارت يعتبر أداة إلكترونية مبتكرة هتسمح للمواطنين إجراء المدفوعات الرقمية، وصرف الدعم، وإتمام العمليات المصرفية بسهولة وأمان.

الكارت الموحد له مزايا كتير زي:

- صرف الدعم التمويني: الكارت هيستخدم لصرف الدعم المخصص للعيش والسلع التموينية من المخابز والمنافذ التموينية.

- خدمات التأمين الصحي الشامل: ممكن من خلاله تحجز المواعيد، وتتحقق من هويتك باستخدام بصمتك للحصول على خدمات التأمين الصحي.

- الدفع الإلكتروني: الكارت بيتيح إتمام المعاملات المالية من خلال ماكينات نقاط البيع للتجار، أو السحب النقدي من خلال ماكينات الصراف الآلي التابعة للهيئة القومية للبريد.

- صرف المعاشات.

- استخدامه كوسيلة دفع في وسائل النقل العام.

- إجراء المعاملات المصرفية والمدفوعات الإلكترونية.

إزاي تقدر تستلم الكارت؟

أول ما الكارت يكون جاهز، رب الأسرة هيجيله رسالة على موبايله، بتحدد مكتب البريد أو التموين لاستلام الكارت. بس يُشترط حضور كل أفراد الأسرة الأكبر من 16 سنة لـ موقع الاستلام مع بطاقة الرقم القومي ورقم الموبايل المسجل لكل فرد. وهيكون فيه فترة شهر لتسليم الكارت من مراكز التسليم، وبعدها فترة شهر إضافية للاستلام من ديوان عام محافظة بورسعيد. وفي حالة عدم الاستلام خلال الفترة دي، هيتم إعدام الكارت.

الكارت كمان مزود بتكنولوجيا حديثة لضمان تأمين البيانات، فبيتم تأمينه من خلال واحدة من الشركات الرائدة في مجال الأمن السيبراني ضد أي اختراق أو تزوير، ده غير إنه بيحتوي على بصمة ذكية بتضمن وصول الخدمة لمستحقيها فقط. وعلشان تطلع الكارت لازم تفتح حساب شخصي في هيئة البريد المصري.