اكسب تذكرتين لـ "جيميرجي" من أكبر الأحداث العالمية للألعاب الإلكترونية

بتحب اللعب والألعاب؟ يبقى أكيد هتحب تروح "جيميرجي"، لأنه واحد من أكبر الأحداث العالمية للألعاب والرياضات الإلكترونية المصممة للكل، شباب، أطفال وعائلات، هواة ومحترفين، فرق وفردي، وهتلاقي فيه كل حاجة خاصة بالصناعة دي، زي تصميم وتنفيذ ألعاب وبرامج، برود كاستينج، ستريمينج، Cosplay، وحتى نقاشات التطوير والدراسة والمعرفة المشمولة في عالم الألعاب.

"جيميرجي" هيكون على مدار 3 أيام، من 30 يناير لـ 1 فبراير، في المركز الثقافي في البروچ في هليوبوليس الجديدة للمطور الإقليمي IMKAN Misr، من الصبح لغاية بالليل، ومجموع الجوائز هيوصل لـ 2 مليون جنيه مصري. وأي حد هيقدر يروح ويشارك في أي لعبة يحبها، ولأول مره هيكون في كشافه دوليين و كمان كشافة من اتحاد الرياضات الإلكترونية.

المكان جنب المركز الطبي العالمي، بعد الشروق ٣، لو جاي بمواصلات فأقرب محطة للقطار الكهربائي هتكون محطة هليوبوليس الجديدة، وهتكون في أتوبيسات مجانية من المحطة لمكان الايفينت والعكس كل ٢٠ دقيقة. لما توصل المكان هتلاقيه متقسم كالتالي:

المنطقة الأولي

ودي منطقة الألعاب والجيمينج لكل الزائرين، وفيها جوايز بنظام الـ Leader board. فيها ٦ جيمز على Mobile و ال PC و PS5 وNINTENDO الـ ٦ جيمز هم EA SPORTS FC 25, PUBG MOBILE, FORTNITE, JUST DANCE, BRAWLHALLA,RAINBOW SIX SIEGE، ده بجانب ال VR, و Car simulators، Boardgames.  

وبالتالي كل يوم في ٥ جوايز لـ ٥ الأوائل في الـ Leader board

المنطقة دي مفتوحة ومتاحة لكل الزوار والفئات العمرية بنظام First come first serve.

المنطقة الثانية

منطقة البطولات والمنافسة، هواة ومحترفين، فرق وأفراد، على أكتر من ٢٠٠ جهاز.

المنطقة دي هيكون فيها ٦ بطولات كل يوم، وكل يوم ١٨ فايز بين أول وثاني وثالث. يعني ٥٤ فايز بين فرق وفردي.

في المنطقة دي بيكون الاشتراك فقط عن طريق التسجيل في المكان، وده عشان ماحدش يشك إن في أي تلاعب في التسجيل المسبق أون لاين. هيكون التسجيل من ١١ لـ ١٢ صباحًا لـ ٣ بطولات، وتسجيل الـ ٣ بطولات التانيين من ٣ لـ ٤ مساءً.   

المنطقة التالتة

مسرح النجوم، هيكون مسرح في قلب المكان بأعلي نسبة مشاهدة وتقنيات  عالية جدًا. هتبدأ المنطقة دي من ٣:٣٠ لـ ٧:٣٠ ومنافسات المنطقة دي هيكون ليها بث مباشر على قنوات جيميرجي في مصر والعالم.

اليوم الأول: متقسم لبطولة ومنافسة FORTNITE بين  ٨ لاعيبة من مصر وبره مصر وهيكون في فايز أول وتاني وتالت، وجزء من الجائزة المالية هيتم التبرع بيها لأي منظمة خيرية في مصر. والجزء التاني من اليوم الأول هيكون المباراة النهائية في بطولة ROCKET LEAGUE  اللي بتتلعب في المنطقة الثانية اللي شرحناها من شويه، وبالتالي الفريقين اللي وصلوا النهائي مش بس هيكسبوا، دول كمان هيلعبوا مباراة قدام كل الحضور.

اليوم التاني: هيشهد مباريات بين ٣ فرق محترفة في لعبة COUNTER STRIKE 2  ولأول مرة في مصر في حدث زي ده هيحضر فرقتين دوليتين، وهم فريق NASR esports  من دولة الإمارات وفريق 9Z  من الأرجنتين والبرازيل، وهيلاعبوا فريق من مصر.    

اليوم الثالث: متقسم  لبطولة ومنافسة LEAGUE OF LEGENDS بين أقوى ١٠ لاعيبة في مصر وهيكون في فائزين أول وتاني وتالت، وجزء من الجايزة هيروح لمنظمات خيرية.

وأخيرًا الجزء الأخير هيكون بطولة EA SPORTS FC 25 بين اقوى ٢ لاعيبة محترفين في مصر وبطل اليوم الأول وبطل اليوم الثاني في الايفينت، ودي فرصتهم إنهم يظهروا قدام أبطال مصر والعالم.  

المنطقة الرابعة

مسرح الترفيه والأحداث والمحتوى, المنطقة دي هيكون فيها حلقات نقاشية مع رواد الصناعة، المؤثرين واللاعبين المحترفين. وفي اليوم الأول والثاني هيكون في منافسات Cosplay فردي وفرق وجوائز للمراكز الـ ٣ الأولى.  

المنطقة الخامسة

منطقة الرعاة والمطاعم. الرعاة حاضرين بقوة في "جيمرجي" بعروض ومسابقات وجوايز، وكمان هيكون في مجموعة كبيرة من الشباب اللي عاملين local products، بالإضافة لمطاعم الأكل المختلفة.       

التذاكر:

في نوعين من التذاكر

１- التذاكر العادية ليوم محدد، ودي حتدخلك كل المناطق ماعدا منطقة العروض والحفلات) و مش محتاج تصرف أي حاجة غير لو هتشتري منتجات أو أكل.

２- تذكرة الثلاث أيام، ودي طبعا تخليك تدخل على مدار ال ٣ أيام كاملة وفي أي وقت وتزود فرصك إنك تحضر كل الفاعليات وتشترك في بطولات أكتر.