الدين مادة أساسية.. تفاصيل نظام البكالوريا البديل للثانوية العامة

محمد عبد اللطيف، وزير التربية والتعليم، أعلن عن نظام البكالوريا المصرية بديل الثانوية العامة، والمقرر تطبيقه السنة الدراسية الجاية، واللي هيتكون من مرحلتين هما: المرحلة التمهيدية (الصف الأول الثانوي)، والمرحلة الرئيسية (الصفين التاني والتالت الثانوي)، والنظام كالآتي:

- الطالب في الصف الأول الثانوي، هيدرس 7 مواد أساسية، وهما: التربية الدينية، واللغة العربية، واللغة الأجنبية الأولى، والرياضيات والعلوم المتكاملة، والفلسفة والمنطق، والتاريخ المصري، بجانب اللغة الأجنبية التانية، والبرمجة وعلوم الحاسب، كمادتين خارج المجموع.

- الطالب في الصف التاني الثانوي، هيدرس 4 مواد وهما: اللغة العربية، واللغة الأجنبية الأولى، والتاريخ المصري، وبعدين هيختار في مسار الطب وعلوم الحياة ما بين مادة الرياضيات أو الفيزياء، وفي مسار الهندسة وعلوم الحاسب، هيختار ما بين الكيمياء والبرمجة، وفي مسار الأعمال، هيختار أما المحاسبة أو إدارة الأعمال، وفي مسار الآداب والفنون، هيختار ما بين علم النفس أو اللغة الأجنبية التانية. 

- الطالب في الصف التالت الثانوي، هيدرس الطالب 3 مواد، وتعتبر مادة التربية الدينية مادة أساسية في كل التخصصات والمسارات التعليمية في نظام البكالوريا المصرية، بالإضافة لـ المواد التخصصية زي الطب وعلوم الحياة اللي بيشملوا: الأحياء مستوي رفيع، والكيمياء مستوي رفيع، والهندسة وعلوم الحساب اللي بيشملوا: الرياضيات مستوي رفيع، والفيزياء مستوي رفيع، والأعمال اللي بتشمل: الاقتصاد مستوي رفيع، والرياضيات، والآداب والفنون اللي بتشمل: جغرافيا مستوي رفيع، وإحصاء.

ووضحت وزارة التعليم إن مش هيكون فيه تدريس لمادة اللغة العربية في الصف التالت الثانوي بنظام البكالوريا المصرية، ومش هيكون فيه علمي وأدبي. والوزارة كشفت عن قواعد تطبيق نظام بديل الثانوية العامة "البكالوريا المصرية" وهتكون كالآتي:

- الامتحانات فرصتين في كل سنة دراسية، مايو ويوليو لمواد الصف التاني الثانوي. يونيو وأغسطس لمواد الصف التالت الثانوي.

- رسوم دخول الامتحان للمرة الأولى مجانًا، وبعد كده بمقابل 500 جنيه لكل امتحان.

- حساب المجموع هيتم بحسب درجة كل مادة من المواد السبعة من 100 درجة، وهيكون المجموع النهائي للطالب بجمع الدرجات الحاصل عليها لكل مادة.

- بالنسبة للمحاولات المتعددة، هيُحتسب للطالب كل المحاولات اللي تقدم ليها، وهيتم رصد كل درجات محاولاته، وهتتحدد السنة الدراسية اللي تقدم فيها الطالب لكل محاولة، وهيتم إرسال قاعدة البيانات بشكل كامل لمكتب التنسيق.

- دخول الطالب الامتحان للمرة الأولى في السنة الدراسية المحددة، من غير تقديم أو تأخير، بالإضافة إن يقدر يعيد الامتحان بعد كده في أي سنة دراسية.

- يقدر الطالب يدرس مواد إضافية في أي مستوى في حالة رغبته في تعدد المسارات، وده بعد انتهاء المسار الأساسي.

- الحد الأقصى لعدد سنين الدراسة للمرحلة الرئيسية هما 4 سنين بخلاف الصف الأول الثانوي.