الفيلم المصري "شكوي 713317" هيتعرض في مهرجان روتردام السينمائي

 فيلم "شكوي 713317" هيتعرض في مهرجان روتردام السينمائي في هولندا في عرضه الدولي الأول والمهرجان هيقام في الفترة من 29 يناير حتى 8 فبراير.

الفيلم هيتعرض ضمن قسم Bright Future اللي بيركز دايمًا على الأفلام الأولى والثانية لمخرجات ومخرجين جدد وبيقدم أعمال جريئة من حيث اللغة السينمائية والمواضيع من مختلف أنحاء العالم.

فيلم "شكوى رقم 713317" كان حصل على جائزة السيناريو من مهرجان القاهرة السينمائي الدولي في دورته السابقة، وقال ياسر شفيعي مخرج ومؤلف الفيلم إن الفيلم جه فكرته من تجربة شخصية حقيقية اتعرض ليها وكانت مؤلمة بالنسباله لما اتعطلت تلاجته وحاول إصلاحها بالطرق المعتادة وفشل وبعد الانتهاء من المشكلة قرر يحولها سيناريو وعمل فني، واختيار اسم الفيلم جه لأنه ده كان رقم الشكوى الحقيقية اللي اتقدم بيها لحماية المستهلك.

فيلم "شكوي 713317" بتدور أحداثه حول زوجين متقاعدين وبيعيشوا حياة هادية في المعادي، لكن تعطل تلاجتهم في يوم من الأيام هيقلب حياتهم تمامًا وهيدخلوا في صراعات كتير. 

بيشارك في بطولة الفيلم محمود حميدة، شيرين، هنا شيحة، محمد رضوان، علي الطيب، تامر نبيل، حنان يوسف، إنعام سالوسة، محمد عبده، جهاد حسام الدين، وهو من تأليف وإخراج ياسر شفيعي، وإنتاج باهو بخش وصفي الدين محمود وجابي خوري واحمد بدوي وغيرهم.