آخر محاربي الحرب العالمية التانية زاروا مصر عشان يرجعوا ذكريات معركة "العلمين"

حضر لمصر في بداية الأسبوع ده، 6 من قدامي المحاربين البريطانيين، اللي شاركوا في معركة "العلمين" في مصر خلال الحرب العالمية التانية، اللي حصلت ليلة 23 أكتوبر سنة 1942. وكالة رويترز قالت إن قدامي المحاربين وصلوا مصر وزاروا موقع المعركة، بعد ما الحكومة البريطانية دفعتلهم تمن الزيارة، عشان يرجعوا ذكرياتهم عن المعركة اللي شاركوا فيها من سنين.

 

موقع "المال" نشر تصريحات على لسان قدامي المحاربين اللي وصلوا مصر، ومنهم المحارب "بلاكبورن" اللي عمره حاليًا 98 سنة، وقال: "كانت (المعركة) جحيما على الأرض إذ أضاءت السماء ومضات طلقات المدفعية وسقطت علينا بضع قذائف لكنها لم تكن تقارن بما أطلقناه نحن على الألمان". وأضاف جو بيل اللي عنده 98 سنة برضه، إنه فقد حاسة السمع بتاعته بسبب صوت القذائف المستمر، وماكانش يتوقع إنه يرجع لبلده تاني.

 

معركة "العلمين" بتعتبر سبب رئيسي في فوز قوات الحلفاء بالحرب، وراح ضحيتها حوالي 13500 جندي.