عرض فيلمين أخرجهم كريم عبد العزيز بمهرجان الغردقة لسينما الشباب

مهرجان الغردقة لسينما الشباب هيعرض في دورته الرابعة تجربتين سينمائيتين من إخراج الفنان كريم عبد العزيز، ضمن برنامج عروض مشروعات تخرج كبار المخرجين والفنانين، اللي بيقدمه المهرجان بهدف إتاحة الفرصة للأجيال الجديدة علشان يتعرفوا على البدايات الفنية لعدد من صناع السينما.

والمهرجان هيعرض الفيلمين وهما "الثقب العالي" و"لوحة من لحم"، اللي أخرجهم كريم عبد العزيز أثناء دراسته في قسم الإخراج فى المعهد العالى للسينما، اللى اتخرج منه سنة 1997.

وبيشارك فى بطولة "الثقب العالي" سيد عبد الكريم وعلاء خميس، والفيلم عن قصة محمد عبد الرحمن وسيناريو تامر حبيب، وفيلم "لوحة من لحم" وهو مشروع تخرجه، اللي بيشارك في بطولته إيهاب فهمى، ميرنا وليد، والممثل السعودى خالد الحربى، وهو من سيناريو علي شوقى وإخراج كريم عبد العزيز.

مهرجان الغردقة لسينما الشباب هيقام في الفترة من 10 لـ 15 سبتمبر، وهيضم فعاليات مختلفة وتكريمات زي تكريم حمادة هلال ومصطفى خاطر.