"كابتن شديد" مسلسل أنيمشن جديد عن بطل خارق مصري في رمضان 2026

المسلسل موجه للأطفال والمراهقين، وبتدور أحداثه عن أب بسيط بيلاقي نفسه فجأة قدام مسؤوليات وتحديات مش مستعد ليها، وبيبدأ رحلة غير متوقعة بيتحول من خلالها لبطل خارق، لكن برؤية محلية مستوحاة من الواقع المصري وتفاصيله اليومية.

"كابتن شديد" من قصة وإخراج المخرج رامي الجابري، ومن إنتاج شركة Divine Touch، وفريق فني ضخم بيضم أكتر من 100 فنان ما بين كتاب ورسامين ومنفذي شخصيات، والعمل بينتمي لنوعية الأعمال الأنيميشن اللي بتجمع بين تقنيات الستوب موشن و2D واللايف أكشن. 

وفي تصريحات لـ المؤلف والمخرج رامي الجابري، قال إن صعوبة تنفيذ مسلسل كابتن شديد كانت دافع أساسي لصناعته، وقال إن العمل موجه بشكل أساسي للأطفال والمراهقين، ووضح إن المسلسل استغرق في تنفيذه 10 سنين، ما بين التصوير وبناء الديكورات وتجهيز الستوديو.