مبادرة "بيتك في مصر" لتوفير وحدات سكنية لمصريين الخارج

مبادرة "بيتك في مصر" اللي أطلقتها وزارة الإسكان بالتعاون مع وزارة الخارجية، فتحت باب الحجز على  أكتر من 5000 وحدة سكنية بـ 12 مشروع مختلف في عدد من المدن الجديدة للمصريين المقيمين بالخارج، زي: العاصمة الإدارية الجديدة، والعلمين الجديدة، والشيخ زايد، والعبور الجديدة، وحدائق أكتوبر، والمنصورة الجديدة، والقاهرة الجديدة.

المهندس شريف الشربيني، وزير الإسكان والمرافق والمجتمعات العمرانية، قال في مؤتمر صحفي إن المبادرة فتحت باب الحجز يوم الخميس اللي فات، وجمعت في أول 48 ساعة من فتح باب التقديم حوالي 2.5 مليون دولار، والتقديم بدأ من يوم 20 فبراير وهيستمر لـ 20 مارس.

المبادرة حريصة على تسليم كل الوحدات بشكل فوري وبحد أقصى مع نهاية السنة، وهتوفر خصومات بتتراوح بين 3% إلى 10% عن سعر السوق، وأنظمة سداد مرنة بتوصل لـ 10 سنين.
 
والموقع الإلكتروني الرسمي للمبادرة بيمكن المستخدمين من معاينة الوحدات عن بُعد بجولات افتراضية دقيقة، والاطلاع على تفاصيل مواقع المشروعات، وإتمام إجراءات الحجز إلكترونيًا عن طريق الكروت الائتمانية، أو الحجز بالطرق التقليدية زي تحويل بنكي، أو تحويل عبر الصرافة. 

وعشان تقدر تحجز وحدتك محتاج تعمل الخطوات دي:

1-  زور الموقع الإلكتروني الرسمي للمبادرة من هنا.

2- اقرأ كراسة الشروط لمعرفة الشروط والوحدات المتوفرة.

3- اعمل حساب شخصي على الموقع.

4- اختار الوحدة المناسبة للحجز.

5- ادفع مبلغ لجدية الحجز 5000 دولار للوحدات السكنية، 9900 دولار للفيلات والوحدات الشاطئية بمدينة العلمين.