محافظ القاهرة: تطوير منطقة السيدة عائشة وتحويلها لممشى سياحي

الدكتور إبراهيم صابر، محافظ القاهرة، أعلن إنه جاري تطوير منطقة السيدة عائشة، وده من خلال مداخلة هاتفية مع برنامج "كلمة أخيرة"، للمذيعة لميس الحديدي.

التطوير هيتم عن طريق محور مروري بديل جاري إنشاءه عشان يكون موازي لمحور صلاح سالم، هيمتد من منطقة مجرى العيون لمنطقة مصر القديمة، وبعد الانتهاء منه بشكل كامل هيتم إزالة وتفكيك كوبري السيدة عائشة، وعمل التحويلات المرورية المطلوبة.

وسبب إزالة الكوبري هو إنه كان بيتسبب في مشاكل وحوادث مرورية كبيرة، نتيجة إن وقت إنشائه في التمانينات اتصمم بعيوب خاصة بالميول لتفادي المباني وقتها، لكن المحافظ أكد إن عملية الإزلة مش هتتم الإ بعد الانتهاء الكامل من بناء المحور البديل، واللي بالفعل حاليًا بيتم العمل عليه. 

و"صابر" قال كمان إن في خطة شاملة لتحويل المنطقة لممشى سياحي بيمتد من مسجد السيدة عائشة حتى قلعة صلاح الدين ومسجد السلطان حسن، ووزارة الآثار هترمم الجزء اللي بتحتويه المنطقة من سور مجرى العيون التاريخي، وإزالة العقارات اللي اتسببت في إخفاءه، وده بعد ما عوضت الوزارة سكان العقارات بمساكن بديلة.

الجدير بالذكر إن دي مش خطة التطوير الوحيدة اللي بتتبناها المحافظة، ففي الوقت الحالي بيتم تطوير سوق العتبة بالموسكي عن طريق رفع كفاءة شوارع الجوهري، ويوسف نجيب، والمسملي.

ومن المقرر إنشاء عدد من الوحدات للباعة الجائلين "طاولات" لعرض منتجاتهم وبضائعهم بدل من "الفرشة"، وتوحيد لافتات المحلات التجارية، وتركيب مظلات لحماية البياعين من الشمس والأمطار خلال فصلي الصيف والشتاء، ومراعاة اشتراطات الإطفاء والحريق والصرف.