منتجات غذائية وحرف يدوية.. انطلاق النسخة التالتة من بازار القاهرة

إبراهيم صابر، محافظ القاهرة، أعلن عن تنظيم النسخة التالتة من معرض "بازار القاهرة" بمجمع السوق الحضاري بالحي العاشر بمدينة نصر، بداية من النهاردة ولحد يوم 23 يناير الحالي، بمشاركة أكثر من ٢٠٠ عارض وشركة. "صابر" قال إن ده أكبر معرض بتعمله المحافظة، من ناحية تنوع المنتجات وعدد المشاركين، وبيعتبر فرصة للأسر عشان يحصلوا على كل احتياجاتهم من مكان واحد وبتخفيضات كبيرة تبدأ من ٢٠% وتوصل لـ ٥٠%.

المعرض هتلاقي فيه منتجات زي الرز، الزيت، المكرونة، السكر، الخضروات والفاكهة، اللحوم والدواجن، كمان ياميش رمضان والتمور والعسل والألبان والأجبان، بالإضافة لمشاركة شركات تابعة للشركة القابضة للصناعات الغذائية بوزارة التموين، ومشاركة ٨٠ عارض من الأسر المنتجة والحرف اليدوية وشباب الخريجين والمشروعات الصغيرة، عشان يعرضوا منتجات الأخشاب والجلود والنحاس.
كمان لو روحت البازار هتلاقي أماكن لبيع للملابس والإكسسوارات والأحذية والبارفانات والنظارات، بتخفيضات توصل لأكتر من ٣٠%، بالإضافة لنموذج مصغر من سوق العبور فيه خضار وفاكهة، وأسماك بالجملة. معرض "بازار القاهرة الثالث" تم اختيار مكان إقامته بالسوق الحضاري بالعاشر الملاصق لموقف زهراء مدينة نصر لسهولة الوصول ليه.