وزارة السياحة والآثار: اكتشاف 3 مقابر من عصر الدولة الحديثة في الأقصر

وزارة السياحة والآثار، أعلنت إن البعثة الأثرية المصرية العاملة بمنطقة ذراع أبو النجا بالبر الغربي بالأقصر، نجحوا في الكشف عن 3 مقابر من عصر الدولة الحديثة، وده خلال موسم حفائرها الحالي بالموقع.

الدكتور محمد إسماعيل خالد، الأمين العام للمجلس الأعلى للآثار، قال إن المقابر التلاتة المكتشفة بترجع كلها لعصر الدولة الحديثة، وتم التعرف على أسماء وألقاب أصحابها من خلال النقوش الموجودة داخلها. ومحمد عبد البديع، رئيس قطاع الآثار المصرية بالمجلس الأعلى للآثار، قال إن واحدة من المقابر لشخص اسمه "آمون-إم-إبت"، من عصر الرعامسة وكان بيشتغل في معبد أو ضيعة اَمون، وأغلب مناظر المقبرة اتعرضت للتدمير، والمتبقي منها بيوضح مناظر تقديم القرابين، وتصوير لحملة الاَثاث الجنائزي، ومنظر الوليمة.

أما المقبرة التانية والتالتة بيرجعوا لعصر الأسرة الـ 18، واحدة منهم لشخص اسمه "باكي" وكان بيتشغل مشرف على صومعة الغلال، أما التانية فلشخص اسمه "إس"، واللي كان بيشتغل مشرف على معبد اَمون بالواحات، وعمدة الواحات الشمالية، وكاتب.  

أما عن تخطيط المقابر، فالدكتور عبد الغفار وجدي مدير عام آثار الأقصر ورئيس البعثة، قال إن مقبرة آمون إم إبت، بتتكون من فناء صغير وبعدين مدخل وبعدين صالة مربعة، وبتنتهي بنيشة مكسور جدارها الغربي خلال إعادة استخدام المقبرة في فترة لاحقة لعمل صالة تانية.

أما مقبرة باكي فبتتكون من فناء طويل شبه الممر، بعدين فناء تاني بيؤدي للمدخل الرئيسي للمقبرة، بعدين صالة مستعرضة بتؤدي لصالة تانية طولية بتنتهي بمقصورة غير مكتملة بتحتوي على بئر للدفن.

ومقبرة "إس" بتتكون من فناء صغير بيحتوي على بئر، بعدين المدخل الرئيسي للمقبرة، بعدين صالة مستعرضة بتؤدي لواحدة تانية طولية مش مكتملة.