40 ألف جنيه.. زيادة سعر دخول مبنى الأوزريون بمنطقة آثار أبيدوس بسوهاج

منطقة آثار أبيدوس، أعلنت عن زيادة سعر دخول مبنى الأوزريون بسوهاج 10 آلاف جنيه، علشان يكون الدخول بـ 40 ألف جنيه بدل من 30 ألف جنيه.

وإدارة منطقة آثار أبيدوس، قالت من خلال صفحتها الرسمية على فيسبوك، إن فتح مبنى الأوزريون الأثري خاص وبيشمل كل الزائرين سواء أجانب، أو مصريين أو عرب بنفس الرسوم، وبعدد 49 زائر أو أقل من كده، ولمدة ساعتين في مواعيد العمل الرسمية، أما في غير مواعيد العمل الرسمية، هيتم تحصيل رسوم إشراف شرطة السياحة والآثار.

وأضافت الإدارة إن زيارة الأوزريون بيتم عن طريق شركة سياحية، وإجراءات طلب الزيارة بتتم بالمجلس الأعلي للآثار بالقاهرة. ولو فيه مجموعة طالبة فتح خاص لمبنى الأوزريون، وعايزة تزور معبد الملك سيتي الأول في مواعيد العمل الرسمية للمعبد، بيقوموا بشراء تذاكر المعبد بالإضافة لتصريح زيارة الأوزريون. 

وأكدت إدارة منطقة آثار أبيدوس، على كل شركات السياحة اللي جاية، بضرورة تجهيز أوراق الزيارة وعرضها على مفتش آثار المنطقة، علشان يستكمل الإجراءات اللازمة للزيارة. والأوزريون عبارة عن قبر رمزي للمعبود أوزوريس، ومكانه في الجهة الغربية من معبد الملك سيتي الأول، وتقدر توصل له بعد نهاية الدرج الصاعد من الممر الغربي من المعبد، وبيتكون من 10 دعامات من حجر الجرانيت الوردي.

في ممر مبنى الأوزريون، هتلاقي كتابات كاملة تخص الموتى والحساب بعد الموت والجنة والنار في العقيدة المصرية القديمة، الكتابات دي مش موجودة بشكل كامل في العالم كله إلا في الممر، فهو بيحتوي على أهم كتابات مصرية كاملة، وده بيبرر سبب إغلاقه لحد ما تم تنفيذ ترميمه على سنين، وبعدين اتفتح بشكل خاص من سنتين بس وفقًا لتصاريح وإجراءات خاصة، ولعدد قليل من الناس حفاظًا على المكان من أي تكدسات أو لمس للجدران. 

المياه اللي موجودة داخل المبنى، هي جزء لا يتجزأ من البناء، وبيرجع مصدرها لقناة فرعية كانت بتوصل من نهر النيل لـ الأوزريون وهي بتمر تحت معبد سيتي الأول.