إعلان لسائقات أتوبيسات نقل عام بمرتب 3000 جنيه في الشهر

ماتستغربش لو لاقيت إعلان في المترو أو الشارع عن شركة بتطلب سواقات ستات علشان يشتغلوا في النقل الجماعي. موقع "التحرير" اتكلم مع صاحب شركة "الإنجليزية للنقل الجماعي" واللي حاليًا بيدوروا على ستات يشتغلوا سواقات أتوبيسات نقل جماعي مقابل 3 آلاف جنيه. صاحب شركة الإنجليزي قال للتحرير إن "الشركة عملت لجنة نزلت الشارع عشان تشوف المشاكل اللى الناس بتقابلها فى المواصلات، نزلت قعدت زى الركاب وكتبت تقريرا بكل المشاكل اللى شافتها، من أبرز المشاكل دى أن السيدات بيتعرضوا لمضايقات، ومن هنا جات فكرة أتوبيسات تسوقها سيدات ومخصصة لركاب سيدات".

الشركة فكرت في حل للمشكلة وبدأت فعلًا تطرح أتوبيسات للسيدات، وبدأـ بأتوبيس واحد بتسوقه سيدة اسمها أم عبد الله، والشركة ناوية تفعل الموضوع في كل خطوط سير الأتوبيس، بيقول عمر الإنجليزي صاحب الشركة للتحرير: "كل خط فيه مثلا 20 أتوبيسا، هيبقي فى 19 أتوبيسا سواقينه رجالة مخصص  كل الناس، وفى أتوبيس واحد فى الخط مخصص بس للسيدات والسواقة هتكون سيدة، وده هيكون على مستوى الـ50 خطا اللى بتتحرك فيهم أتوبيسات الشركة"4

الوظيفة غير المرتب فيها تأمين ومكافآت وتعيين كمان، ساعات العمل من 8 ل 10 ساعات والسن المطلوب من 25 ل 50 سنة. المطلوب علشان تقدمي للوظيفة: رخصة مهنية، بطاقة وشهادة ميلاد، فيش جنائي باسم الشركة ووصل كهربا. وطبعًا لازم تكلمي الأرقام الموجودة في الإعلان أو تروحي مقر الشركة وتملي الأبلكيشن. من الواضح إننا هنشوف سواقات أتوبيسات كتير الفترة الجاية.